Durante un anochi ameno, a lansa fase II di proyecto ‘Cas Ariba’, situa den e Bario di Santa Cruz.
Un proyecto tin como meta pa crea facilidadnan recreativo y lugarnan di encuentro pa mantene e interaccion local, cultural, y experiencianan nobo pa e comunidad local y brinda nos bishitantenan tambe e oportunidad pa yega cerca di nos hendenan y nos cultura.
A.T.A. ta comprometi pa sigui inverti den proyectonan cu ta beneficia e comunidad local y nos turismo, enfocando riba area di seguridad, nos playanan, conservacion di naturalesa y medio ambiente, preservacion cultural, y mas.. A.T.A. ta desea di mira un mihor reparticion di bishitantenan rond di nos isla, y mira bishitantenan drenta nos barionan.
Un di e caracteristicanan remarcabel di e proyecto ‘Cas Ariba’ ta e ‘Anker Oro’ riba Plaza Deto Varis, cu lo keda funciona como un lugar central pa famia, amigonan, y conocirnan encontra durante celebracion nacional, recreativo, cultural di p.e. Dia di Betico, 18 di Maart, Dia di Rey, y mas. Alabes, sirbiendo como un lugar di atraccion adicional cu e bishitante por bishita.
A.T.A. ta dedica 13% di e presupuesto na e desaroyo directo di e producto local pa comunidad di Aruba. E proyectonan ta multipel y ta inclui e.o. mehoracion di nos playanan, pensa aki riba e proyecto di Seroe Colorado, pero tambe mehoracion di facilidadnan na Mangel Halto. A drecha e trapi na Hooiberg, ta dedicando atencion na Ayo & Casibari Rock Formations. Tambe lo haci inversion na e kapel di Alto Vista pa asina sigura cu e area aki ta keda uno sereno y calmo. Ta colocando Mountain Bike Trails, di 54 km y asina tin hopi otro proyecto cu a wordo completa of cu ta den ehecucion.
A.T.A. ta felicita e comunidad di Santa Cruz y Cas Ariba y ta gradisi e habitantenan cu a bin cu e iniciativa. Hunto nos ta contribui na e rikesa historico y cultural na Aruba.
