Diahuebs dia 25 di januari Museo Arqueologico Nacional Aruba (MANA) un bes mas lo habri su portanan gratis entre 10’or di mainta y 2’or di merdia pa celebra Dia di Betico. Bishitantenan por disfruta di diferente experencia unico y nobo.
Por sigui trabou den progreso den Cas Dundun, incluyendo mueblenan y potretnan antiguo, panel cu pintura di Pandellis di paisahe di costa di San Nicolaas. Tin primicia di 4 documentario produci pa Rebecca Roos Productions pa MANA y financia door di UNOCA. Un ta trata epocanan historico di Aruba, basa riba pinturanan original di Ephraim Britten. Dos documentario ta explora historia di famia Ecury pa medio di “Mamachi” (mama di Dundun) y Helena Leon, matriarca di entre otro famia Ecury. E di cuater documentario tin Dada Picus como protagonista, kende a traha e mansion di Dundun Ecury. Hunto e documentarionan ta dura mas o menos 30 minuut.
E artista contemporaneo, internacionalmente reconoci y premia, Sharelly Emanuelson ta habri su installacion ‘Tene A” cu un ‘performance’ y ‘sesionnan interactivo cu publico. Lo tin unicamente tres sesion cu Sharelly. E prome ta 10:30 y e ultimo ta 12:00. Cada session ta dura mas o menos 15 minuut. UNOCA ta sostene Sherelly su presentacion durante 2024 den MANA.
Bishitantenan por experencia dos produccion audiovisual fascinante cu artista local Natusha Croes a desaroya. Esakinan a ser financia pa PBCCG y UNOCA. Bishitantenan por mira “Lama ta Caminda”, cu ta trata e relacion di Rancho y Tera Firme. Den rembak ta presenta e produccion poetico audiovisual “AWA ta Bida”. Natusha tambe lo presenta 3 performance entre 12 or y 13:00. Cada un ta dura mas o menos 5 minuut.
Espacionan pa presencia e performancenan – presentacion teatral escena- ta limita. Tambe pa facilita fluho di publico ta pidi encarecidamente pa yama MANA na 582-8979 entre 8:30 pa 16:30 pa inskribi y sigura un luga.
Desaroyadora di “Conoce Bo Isla” lo bende tres buki di busca palabra/ crucigrama cu ta contene hopi informacion di nos dushi Aruba. Koor Amigonan di Hesus y Maria (AHM- koor) ta percura pa actividadnan atractivo pa mucha y lo bende algun pasa boca y coi bebe pa nan recauda fondo.
Entrada pa MANA ta via e porta mahestuoso di Cas Dundun, e edificio central berde.
Bishitantenan por explora entre otro e hardinnan, e terasa riba prome piso y relaha den Fruteria. Bin sera conoci y disfruta di tur e tesoronan nobo cultural y permanente cu MANA ta ofrece nos comunidad. Haya sa mas di nos artistanan hoben, nos historia y nos cultura .