Na spaño tin un dicho cu ta aplicabel den e declaracion cu e Scorpion Corupto Otmar a trece padilanti esta; “el burro le dijo al puerco orejón”. Desde fin di 2009 no a existi un maneho consistente pa desperdicio. Otmar y e minister actual di Medio-Ambiente ta responsabel di esaki, pero Otmar den un desesperacion total ta pone hende cuminsa pensa cu e ta “perde haya “! Ta increibel y insolito con tanto desparate por sali for di un mente intoxica!
Otmar ta menciona cu gobiernonan di ultimo 15 pa 20 añanan no a haci nada pa Serlimar, incluyendo di e manera aki su mes aden. Segun mi su calculacionnan no ta bon den su “perde haya”.
Na fin di 2001 e gobierno di e tempo ey a tuma e curashi pa realmente ataca e problematica di desperdicio den su totalidad. No tabata un solucion AD HOC, manera cera dump di un dia pa otro of laga crea un dump nobo door di daña un parti bunita di Aruba, esta Sero Teishi.
E tempo ey, a bin cu un plan total pa cera TUR dumpnan na Aruba y esaki a tuma lugar! “Geen woorden maar daden”!
Fase 1 a percura cu dentro di 6 luna a stop e kimamento di desperdicio na Parkietenbos, cu tabata sosode na forma habri y sin control. Esaki a sosode riba prome di mei 2002, ora a stop cu e intoxicamento di e pueblo di Parkietenbos y vecindario. E dump di Parkietenbos a bira un “sanitary landfill”!
Na mes momento a cera e dumpnan na Vader Piet y Jaburibari. E ultimo aki a wordo converti den e parke recreacional Parke Curazon. Esakinan ta FACTS!
Cu e realidad den mente cu e “sanitary landfill “⁵ lo yena den 5 aña, a cuminsa cu e proceso pa un SOLUCION DURADERO, SOSTENIBEL Y PAGABEL!
Hunto cu FDA (placa di ayudo Hulandes y di Aruba) y Aruba Investment Bank, a cuminsa cu un proceso habri y transparente, cu na 7 ocacion tanto hueznan den Prome Instancia y Hof a subraya, pa un solucion duradero, sostenibel, duradero y pagabel. Un grupo di expertonan cu supervision di tanto FDA como AIB, a conseha pa bay over na bin cu proceso di “Waste Away” di Bouldin & Lawson”! Tambe ta FACT!
Asina aki na fin di 2001 a para e desangramento di Serlimar. E haci Serlimar un compania estatal “Sui Generis” y pone hendenan capacita pa maneha esaki y mas importante SIN CORUPCION! Na fin di fin di 2009 e gobierno di AVP mesora a cuminsa descuartisa y desangramento di Serlimar a cuminsa atrobe! A endueda sin misericordia. Y Otmar tabata cumplice como minister di AVP e tempo ey y awor kier bin hunga “mooi weer” y den un wega di “perde haya”?
E desaster total a bin na 2017, na momento cu Otmar y POR a drenta gobierno, ora cu e corupcion y malgastmento di placa a para bira algo normal. A cuminza na huur e localidad na Pos Chikito di un sponsor, otorgamento di contractnan miyonario na otro sponsor! Nombracion di un director cu antecedentenan dudoso y manipulacion pa logra haya mas fondo pa Serlimar sin un plan concreto, sostenibel y pagabel. E cherry riba e bolo ta e compra CORUPTO di e incinerator chikito for di sponsor! Cu btw NO ta traha!
Awe e mesun corupto aki kier baha su gal na Ser’i Teishi, pero esaki a wordo poní eynan pa Otmar complace cu sponsornan por medio di contractnan miyonario. E desaster di Serlimar Otmar mes ta complice di esaki. Tambe ta un FACT!
Lamentabel ta e hecho cu henter Parlamento ta “muisstil”, dicon? Miedo di trapa riba teenchi di sponsor? E falta di maneho a cuminsa na fin di 2009 y “geen haan die ernaar kraait”! Parlamento a hasta yuda boycot e solucion duradero sostenibel y pagabel pa despues cera wowo y boca pa e periodo Otmar cu tabata yená cu corupcion. A permiti duna sponsor loke e ta pidi. E OMERTA di parti di Parlamento a culmina e ultimo añanan, pasobra apesar di e casonan cu a perde den corte te ainda ta keda sostene un minister cu no sa unda su cara ta para pa loke ta trata maneho di desperdicio. No tin maneho at all!
Tur tipo di color a wordo usa pa cualifica e “supuesto” maneho pero tur esaki ta “window dressing “. Al final esun cu lo bay paga pa tur e macakeríanan lo ta e pueblo Arubiano. Elo bira pio cu un Parlamento complaciente y cu boca “callao”! Otmar bai wak bo cara den spiel , bo por a “get away” cu e decision di Hof pero un biaha mas mi ta challenge bo, manera e titulo ta bisa:
Aparte di ta Corupto Otmar ta perde haya! J’ACCUSE!
Aruba, 18 di januari 2024