Despues cu lidernan di algun pais a urgi congreso pa respeta e voz di e pueblo
“Ocacionnan asina ta pone bo realisa con fragil democracia ta den algun pais y ta pone bo sinti mas gratitud ainda pa e stabilidad y bendicionnan cu nos tin na Aruba”
ORANJESTAD – E fin di siman cu a pasa, Prome Minister Evelyn Wever-Croes tawata na Guatemala pa e traspaso di mando di Presidente saliente senior Alejandro Giammanttei pa señor Bernardo Arévalo. Prome Minister a expresa cu esaki tawata un honor grandi pa por a participa pa representa Aruba y Reino na un ocasion asina importante.
Sinembargo, Prome Minister a remarca, e ceremonianan no a bay sin problema. Cierto momento tawata tin hasta resistencia di parti di Congreso di Guatemala pa huramenta e Presidente nobo. Na e momento aki, algun lider, presidentenan di paisnan a yama un reunion di urgencia. Prome Minister hunto cu Presidente di Costa Rica, señor Rodrigo Chaves Robles, Presidente di Paraguay, señor Santiago Peña, Minister Presidente di Belize, señor Johnny Briceño varios canciyer, Presidente di Organization of American States (OAS), señor Luis Almagro y tambe representante di Union Europeo, señor Josep Borrell, a emiti un declaracion den cua nan a urgi Congreso pa respeta e voz di e pueblo di Guatemala, cu pa mas di 60% a vota pa Presidente Arévalo na augustus ultimo y pa laga su huramentacion tuma luga.
Despues di un atraso di 9 ora, democracia a prevalence y e ceremonia di huramentacion di Guatemala su presidente nobo Bernardo Arévalo y vice presidente nobo Karin Herrera a tuma luga den oranan di marduga. “Di parti di Aruba y di parti di Reino Hulandes, mi ta felicita nan y desea nan hopi exito. Tambe mi ta felicita pueblo di Guatemala cu nan Presidente nobo”, Prome Minister a expresa.
Presidente Arévalo tawata tin un programa hopi ambisioso basa riba combati corupcion y respeta derecho humano. Gobierno di Aruba ta sostene esaki y Prome Minister durante su combersacion cu Presidente Arévalo a indica tambe na e presidente cu e por conta cu e sosten di Aruba y di henter Reino Hulandes den esaki.
“Momentonan asina, ta momentonan grandi pa representa Aruba. Ora cu presencia tur loke cu ta wordo haci pa stroba un presidente elegi democraticamente pa su pueblo tuma mando, ta pone bo realisa con fragil democracia ta den algun pais den nos region. Pero tambe ta pone bo sinti mas gratitud ainda pa e stabilidad y bendicionnan cu nos tin na Aruba”, Prome Minister Evelyn Wever-Croes a expresa.