San Nicolas – Diaranson mainta pasa di 10’or, San Nicolas ta wordo sacudi pa un zonido fuerte di un explosion.
Mesora yamadanan a cuminsa drenta pa mira kiko por a pasa.
911 ta esun cu a haya e prome informacion cu tawata tin un explosion ariba tereno di Valero y cu lo ta trata di un tanki ariba un truck a explota.
Na yegada di e unidadnan di rescate nan ta wordo informa cu tin 2 homber herida y nan situacion ta serio. Ambulance a wordo pidi cu urgencia.
Brandweer ta e departamento concerni pa tipo di desgracia nan manera esaki. Na mes momento bomberonan a constata varios barinan cu contenido desconoci a spart rond.
Ta parse cu ta barinan cu tin mas cu 10 aña ariba e tereno.
Dos ambulance a yega y cu ayudo di polis a cera e camindanan pa e dos ambulancenan yega Hospitaal mas lihe posibel. Por a nota cu ambos ambulance no tawata core ariba un velocidad halto, manera normalmente nan lo haci.
