Bario di Shiribana/Paradera a bira hopi atractivo pa adictonan ambulante, pa varios motibo, un cas grandi caminda nan por haya y uza nan droga libremente. E cas ta situa banda di varios negoshi bon frecuenta y ta haci facil pa nan por mendiga pa placa of cuminda. E cas ta central cu nan por cana den full e bario, causando hopi molester na negoshinan y e habitantenan.
Shiribana/Paradera:
Ultimamente por mira hopi cara nobo di adictonan ambulante den bario di Shiribana/ Paradera. Na Shiribana tin un cas caminda nan ta frecuenta, ta biba eynan of ta bishita, e adictonan of esnan cu ta bin pa cumpra/busca droga, ta varia di hobennan aparentemente te hasta menor di edad te cu hendenan di edad halto. Tur siman por mira caranan nobo na e conocido cas di droga aki.
Servicio di entrega di droga te na auto pa un hobencito.
Segun nos a compronde durante dia of te hasta den oranan di anochi of marduga, hendenan den tur marca di autonan ta yega para dilanti di e cas of riba parkeerplaats di e Supermercadonan den cercania. Nan ta warda den auto pa asina haya nan “mercancia” entrega te na auto, esaki si acaso nan tin berguensa di wordo mira of no kier baha for di auto. Tur hende cu ta biba eybanda ta mira full e show, menos e autoridadnan concerni.
Algun dia pasa por a mira te hasta un hobencito (menor di edad) haciendo e trabou di courrier, e tabata sali for di e cas bay na e auto entrega algo y ta core bay bek paden. Tambe por mira damanan di tur edad cu ta drenta den e cas aki.
Na varios ocasion por a mira polis na e cas aki, pa intermedia den problemanan entre e doño cu e adictonan ambulante cu lo ta “huur” camber cerca dje. Pero cu si a yega di haya droga of a detene hende cu droga na e cas aki no ta conoci pa nos.
E adictonan ambulante ta causa tambe molester door di para dilanti di e negoshinan den cercania pidiendo placa of cuminda, Tin algun cu ta bay te hasta na autonan bati na e glas pa pidi placa.
Deal cuminda pa droga
No ta placa so nan ta pidi pero nan sa sinta canto di porta di un establecimento di fastfood y ta pidi cada cliente pa placa of sandwich, bisando cu nan tin hamber, pero manera nan haya e pan den nan man, mayoria di bes nan no ta come esaki, pero ta hibe na e cas aki y muy probablemente nan lo por ta cambie pa poco droga. Semper un rato despues nan t’ey back sinta dilanti di e fastfood restaurant pa asina sigui pidi pan of placa. Segun un persona cu conoce e materia aki, a splicanos cu e modus operandi aki tambe ta un forma cu e adicto ambulante ta deal su droga, dus cambia cuminda cu nan haya pa droga.
E deal di cambia cuminda pa droga, lo ta bin pa motibo cu hopi biaha hende ta prefera di duna un adicto cuminda y no placa, haciendo esaki di bon curason sin sa cu e adicto por bay cambi’e pa droga. Ora di duna un adicto cuminda lo ta bon pa pone tino si enberdad e ta come of ta bay deal e pa droga. E cuminda cu a wordo cumpra cu amor pa prohimo hopi biaha sa wordo uza como pa nan yega na droga, pa satifase e hamber pa droga y no e hamber pa yena stoma. Te hasta dunando cuminda lo por sigui hundi e adicto ambulante un poco mas.
