Desde inicio di Gabinete Wever-Croes, Minister President Evelyn Wever-Croes a indica cu e aparato gubernamental di pais Aruba mester haya mas atencion, y mester introduci cambionan, entre otro di digitalisacion. Meta di e cambionan aki ta pa por mehora e servicio na ciudadanonan di pais Aruba, y pa trece mas transparencia den e procesonan, pa asina tur hende sa kico e procesonan ta. Esaki lo baha e grado di riesgo pa corupcion tambe.
Den aña 2022 a cuminsa e trabounan preparatorio, y den 2023 e estudio a inicia pa restructura e aparato gubernamental, pa haci e aparato uno mas agil, mas eficiente, mas transparente y mas confiabel.
Den cuadro di Landspakket, den colaboracion cu Hulanda, e compania Price Waterhouse Coopers di Hulanda a gana e destaho, y a cuminsa cu entrevistanan den tur departamento di Gobierno. E pregunta cu lo wordo contesta den e estudio ta: cual ta e tareanan cu ta wordo haci awor den gobierno, cu mester wordo haci pa gobierno, y cualnan no. Tambe: cual ta e tareanan cu NO ta wordo haci den gobierno awor, pero mester wordo haci pa gobierno.
E conclusionnan di e estudio aki y e recomendacionnan lo wordo entrega na april di 2024, y a base di e recomendacionnan lo tuma decision cual ta e cambionan structural cu lo wordo ehecuta riba termino corto, y cualnan mester mas tempo di preparacion.
“Nos ta ansioso pa haya e conclusionnan di e estudio aki, pa asina por restructura e aparato gubernamental. Hunto cu e trayecto di e-Government, lo mehora e servicio na comunidad visiblemente. Esey tabata nos compromiso desde cu mi a drenta den Gobierno. Lamentablemente e pandemia mundial Covid-19 a stroba hopi di e plannan, pero awor lo cuminsa mira e resultadonan. Nos no ta premira cu empleadonan publico lo perde trabou, mirando e escases grandi cu tin den practicamente tur departamento di Gobierno. Importante ta cu nos ta prepara e aparato gubernamental pa por sirbi e necesidadnan di Aruba pa nos futuro generacionnan por realisa nan soñonan”, Minister President a finalisa bisando.