Loke ta kere tabata un espectaculo di vuurwerk pa ricibi Aña Nobo, a bira un tragedia ora cu un hoben di 21 aña tabata transporta diferente elemento cu vuurwerk y e auto a cuminsa kima.
Aparentemente, e hoben afecta tabata bolbe hunto cu su amigo for di Alemania pa Nieuwleusen, na e provincia Overijssel na Hulanda, cu un cargamento di vuurwerk pa celebra anochi di Fin di Aña cu su famia y sernan keri, ora cu e incidente a sosode.
Meymey caminda, e dos pasaheronan a sali den panico for di e auto ora e tabata casi cla pa rementa entre luznan briyante di e vuurwerk, cu despues a kibra e auto completo.
Segun un medio local, e pasaheronan tabatin 75 kilo di vuurwerk cu diripiente a cuminsa kima pa un imprudencia di un di e hobennan cu a haya ta bon pa cende un sigaria den auto.
Parce tambe cu biento a hunga un mal chansa na e hulandes, ora cu el a tira e sigaria pafo di bentana, y esaki no a cay ariba caminda, pero si paden di e auto.
Aparentemente, e tabatin asina mal suerte cu e biento fuerte a dirigi e sigaria ainda cendi na e parti patras di e auto unda e vuurwerk tabata, causando cu esakinan a cende y cuminsa rementa den e auto.