ORANJESTAD – Algun minuut despues di 5:00 PM, dia 28 di december, a surgi un cortocircuito den un di e transformadornan den planta di WEB. Esaki a conduci na un Brown out, un interupcion di coriente pa diferente area di nos isla. Debi na e fayo aki e sistema di pompnan cu ta pomp awa pa Aruba a perde coriente tambe y consecuentemente e preshon di awa a cay pa varios parti di Aruba. Personal di WEB mesora a drenta accion pa isola e causa pa por recupera coriente mas pronto posibel. E proceso aki mester a bay hopi controla pa e planta no cay atrobe, mirando e situacion delicado. Pa 7:29 PM a logra reestablece suministro di coriente 100% pa ELMAR y consecuentemente pa nos isla henter. En total a tuma 2 ora y mey pa recupera suministro di coriente pa e isla completo.
Despues cu a descubri e fayo, por a calcula cu lo a dura ±2 pa 3 ora pa recupera e suministro completo pa nos isla. E prome area cu a recupera coriente alrededor di 6:18 PM tawata e area di hospital y hotelnan. Despues a sigui e areanan di Palm Beach, Noord, sigui pa Balashi y Parkietenbos, sigui pa Santa Cruz, Savanta y Pos Chikito. Finalmente a logra reconecta San Nicolas. E secuencia den recuperacion di suministro di coriente pa e diferente areanan ta depende di stabilidad di e red di coriente y demanda di coriente na e momento ey. A logra reestablece e presion y suministro di awa alrededor di 7:13 PM pa e areanan afecta. Pa 7:29 PM ekipo di produccion di WEB a logra reestablece coriente na e partinan afecta hunto cu personal di Elmar na e substationnan rond Aruba.
Durante e periodo di interupcion, gerencia a dicidi di pospone e celebracion cual tawatin planea pa empleadonan di WEB na e momento ey. Debi na e brown out no tawata prudente pa e celebracion sigui. A pidi comprension di empleadonan y a enfoca completamente pa sigui cu recuperacion di suministro di coriente. Gerencia ta gradici tur empleado pa nan comprension den esaki.
Di parti di gerencia y empleadonan di WEB Aruba, ta ofrece disculpa pa e inconveniencia causa pa e brown out di 28 di december. Gerencia ta hopi consciente cu un interupcion di coriente y/of awa no ta agradabel y ni conviniente. Empleadonan di WEB su departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di brown out mas tanto posibel y pa mantene comunidad informa. Un biaha mas WEB su gradicimento pa e comprension y pasenshi.