Santa Cruz – Diahuebs anochi mas o menos rond di 10’or y 15 alarma a wordo bati pa un cas na candela, net pabou di rotonde di Santa Cruz.
Mesora unidadnan di Brandweer y tambe di polis a sali pa dicho cas; y berdad na yegada ta confirma cu e cas cu yen mata pabou di Botica Maria ta completamente na candela.
Ta trata di un meneer masha conoci mes den Santa Cruz, esta Archi.
E cabayero aki hunto cu su señora tawata paden, ora cu nan a haya holor di huma.
Mester remarca cu ta trata di dos persona di edad. Asina mes nan a sali mesora di e cas, unda cu e candela parse lo a cuminsa den e veranda y expande.
E caminda cu ta pasa dilanti e cas a wordo cera ambos banda, tanto di rotonde Santa Cruz y e crusada di Notaris Tromp.
Bomberonan cu a yega den e unidadnan mesora a drenta accion y alabes a solicita pa ambulance, mirando e cu e pareha tawata hopi emociona y posiblemente te hasta por a inhala huma.
Dos ambulance a presenta na e sitio pa atende cu e pereha y despues lo a sali cu nan pa Hospitaal.
Sra. Rodriguez di Slachtofferhulp a wordo poni na altura tambe pa vang op e pareha aki cu a perde por bisa tur locual nan tawata tin.
Imagina tur nan recuerdonan di acumula di henter nan bida perdi den e un candela tres dia prome cu aña ta caba.
Investigacion lo mester saca afo ta kiko por a cuminsa e candela y cu esaki a expande asina lihe, consumiendo e cas por completo.
