ORANJESTAD, Aruba 8 December 2023: Aruba su Presupuesto Nacional 2024 lo keda trata den e proximo simannan nos dilanti. Un presupuesto nacional ta un plan financiero cu ta describi con un gobierno lo gasta su placa durante un aña, generalmente ta e periodo for di januari te cu december. E ta un herment crucial pa e maneho economico y tin un papel vital den e logro di e obhetivonan di desaroyo di un pais, asina Parlamentario di Fraccion di MEP, Ricky Hoek a duna di conoce.
E aña aki ta pa prome biaha cu gobierno di Aruba ta entrega tambe e ‘Nota di Presupuesto 2024’. Esaki ta un documento cu ta duna informacion riba e puntonan cu mas ta resalta den e concepto di Ley di Presupuesto di Pais Aruba pa aña 2024. Alabes e ‘Nota di Presupuesto’ ta mustra un resumen cortico di e plannan di maneho di Gabinete Wever-Croes II pa sigui traha riba e futuro di nos pais.
E partinan positivo di Presupuesto 2024 ta, cu e la keda entrega na tempo, cu ta dia 1 di september 2023, manera leynan ta prescribi. Banda di esey, e presupuesto ta demostra di ta balansa y positivo. Asina por wak cu tin un entrada di Afl. 1.682 miyon y un gasto di Afl. 1.612 miyon. Esaki ta un surplus di 1.0% cu ta ekivalente na un suma di Afl. 70 miyon. Di e manera aki, Gabinete Wever-Croes II ta demostra di ta traha serio na e progreso di cada ciudadano y pais Aruba, Ricky Hoek a indica.
Awo pakico e Presupuesto Nacional ta asina importe pa Pais Aruba?
- Planificacion y stabilidad economico: un presupuesto nacional ta brinda un cuadro den cual ta duna guidelines unda y con pa aloca e fondonan disponibel. Asina aki, di un manera eficiente y efectivo gobierno por logra su metanan nacional manera crecemento economico y reduccion di pobreza.
- Transparencia y confiansa publico: e presupuesto ta brinda transparencia na e operacionnan financiero di gobierno, loke ta duna e ciudadano di compronde unda e fondonan, cu ta su placa di belasting, ta wordo inverti positivamente. E transparencia aki ta duna confiansa den gobierno y ta fomenta un sentido di ‘ownership’ den e proceso presupuestario.
- Asignacion di recurso y establecimento di prioridad: e presupuesto ta sirbi como mecanismo pa asigna entre e recursonan scars kico ta e prioridadnan. Por ehempel e area di educacion, salud, bienestar social.
- Desaroyo social y oportunidad igual: e presupuesto por wordo uza pa promove desaroyo social y oportunidad igual. Mediante di asignacion di e recursonan pa programanan special pa combati pobreza den nos pueblo.
- Participacion y compromiso publico: e proceso presupuestario mester por brinda oportunidadnan pa participacion y compromiso publico. E ciudadano mester tin su voz na momento cu ta traha riba e presupuesto. Esaki ta pasa por ehempel pa medio di reunion di comision cu Parlamento di Aruba ta tene cu diferente stakeholder y ta pasa e informacion aki pa gobierno di Aruba.
Pues asina por conclui cu e presupuesto nacional ta un herment vital pa e maneho economico y pa logra e obhetivonan di desaroyo di nos pais Aruba. E ta promove e planificacion economico, stabilidad, disciplina fiscal, transparencia, asignacion di recursonan, coordinacion entre ministerionan, desaroyo social y participacion publico, Parlamentario Hoek a finalisa bisando.