L.G.Smith Boulevard – Diamars anochi rond di 8’or polis a stop un truck, debi cu nan lo a mira e chauffeur ariba cellphone.
Durante cu polisnan tawata papiando cu ne, e la splica e agentenan cu e lo ta caminda pa un hotel pa haci instalacion di zonido pa un compania.
Polisnan a ripara cu mientras cu nan tawata atende cu e chauffeur e lo a cuminsa actua nervioso. Dado momento e homber lo a trata di core bay y aki ta unda nan a detene y pone sinta den e patruya.
E la wordo deteni debi cu e no por a mustra un documento pa ta legal ariba e isla, pues manera e ta wordo bisa den pueblo ilegal.
Durante cu e tawata den e patruya wardando pa asina e wordo hiba warda di polis pa ser presenta dilanti un Sub Fiscal, e homber a logra habri e porta di e auto pa e core bay.
Polis a actua y manda e homber tera, unda a boei e na man y pia. E homber e ora a bira basta emocional y tawata yora bisando cu e ta sorry.
Representante di e compania di zonido a yega pa pone su mes na altura di locual a sosode cu un empleado di dje.
