ORANJESTAD – Awe merdia Hof a tuma decision riba e peticion di abogado di Paul Croes, pa scucha e hendenan cu a regala Paul Croes placa, dia su casamento.
ARUBA NATIVE por a compronde cu Hof ta haya cu tin cantidad di carta di hendenan cu a bay e casamento y pa bay scucha tur e hendenan, e ta bira di mas.
E “regie zitting” di 7 November 2023 tabata un preparacion pa e apelacion di Paul Croes, contra e sentencia na December 2021 caminda Hues a dicidi cu Paul Croes ta culpabel di labamento di placa y lo mester paga mas cu 183 mil florin. Hues a pone medida di pago cu si Paul Croes no paga, e lo mester bay 1 aña sera.
PAUL CROES NO A PRESENTA
Ta asina cu dia 7 November 2023 ora di trata e “regie zitting”, Paul Croes no a presenta. E abogado nobo di Paul Croes, mr. D.Croes, a bisa Hof cu Paul Croes no kier bin Corte. Ayera por a constata cu atrobe Paul Croes no a presenta.
PETICION ‘REGIE ZITTING”
Den e “regie zitting” e abogado nobo di Paul Croes, mr. D.Croes, a pidi Hof pa duna un chens pa scucha tur e hendenan cu a regala Paul Croes, envelop cu placa dia di su casamento. E abogado a splica Hof cu esaki ta un proceso hopi fastioso pasobra ta un tradicion na Aruba cu ora di casamento, invitadonan ta duna envelop cu placa. Awor ta fastioso pa pidi cada hende pa bisa cuanto placa a duna. E abogado ta haya cu esaki lo por splica cu no tabatin labamento di placa. Na opinion di e abogado, e caso aki tin casi 10 aña andando y e ta haya cu si warda algun luna mas, pa otro aña lo por tin mas claridad.
PG a reacciona cu for di April 2023, a pidi e abogado kico e kier pa sosode pa ta cla pa e caso den apelacion. Awor na November 2023 ta scucha e abogado ta pidi pa duna un chens pa scucha esnan cu a regala placa na casamento di Paul Croes. Na opinion di PG, ta casi 10 aָña a pasa y ainda abogado kier pa scucha e hendenan. PG a pidi Hof pa rechaza esaki.
HOF TA RECHAZA PETICION
Awe merdia Hof via video conference a bisa cu si considera cu tin cartanan di un cantidad di hendenan caba cu ta bisa cu a regala Paul Croes placa, Hof no ta mira e necesidad pa bay scucha nan. Hof su decision ta cu e ta rechaza e peticion. Hof a bisa cu dia 21 Maart 2024 pa 2’or di merdia, lo trata e apelacion di Paul Croes.