Recientemente e autor multifacetico – Quito Nicolaas – a ricibi e grato noticia cu na La Paz, Bolivia, e buki cu su obranan elegi a keda publica. Esaki despues cu e a keda invita pa manda su obranan – segun e criterionan di e organisacion – pa ser huzga door di un comision. Ta trata di e proyecto Psycho poesia – cu lo uza na scolnan secundario di Bolivia. Tabata un encargo hopi dificil pa cumpli cu ne, debi cu via di otro medionan bo ta cera conoci cu e diferente areanan di e medio ambiente y problemacia di Bolivia cu door di un populacion creciente, no tin suficiente espacio pa nan deshaci di nan desperdicio. Sin embargo usando su conocemento di e materia y creatividad, e autor a logra di describi den su obranan e naturalesa y dilema cu e poblacionan ta confrontando
Anteriormente na Juli di e aña aki a sali riba mercado e buki – Un Canto Planetario – consistiendo di dos tomo. Den e buki aki e ensayo di e autor encuanto Cambionan Climatologico den America Latina a sali publica. Aunke e situacion na America Latina ta completamente diferente cu esun di e.o. Estados Unidos, Union Sovietico, Europa, China, kendenan ta esnan cu ta causante di e problemanan aki. Na dicho continente di America Latina nan tin di enfrenta e problemanan di pobresa, educacion y infrastructura. Mester stimula un conciencia bou di e poblacion pa asina nan ta alerto den e ambiente cu nan ta bibando y e riesgonan cu esaki ta trece cu ne pa futuro generacionnan. Y mester pursigui un desaroyo economico, pa yega na un situacion di stabilidad.
Den su ensayo e autor – Quito Nicolaas – ta mustra entre otro riba e fabricanan bieu, normanan aplica pa cu e forma con ta afecta e clima y con por evita esaki. Pero tambe e custumber di e forma con e habitantenan ta anda cu e desperdicio di sushi. Con a lo largo esaki ta contamina e awa cu un tempo tabata bunita pa hunga aden y cu ta bira un menasa despues di tempo. Of un playa unda antes e hobennan tabata hunga, awor mester a traha luga pa un fabrica cu su chiminea bin den su luga. E encargo tabata pa scirbi over di un tema, cu ta pone e alumnonan pensa, refleha y forma un punto di bista pa futuro di nan pais. Mester bisa si cu e caso di America Latina ta diferente cu esun di e islanan Caribense. Sin embargo den Caribe tambe nos mester ta prepara pa cualkier eventualidad y no laga esaki sorpresa nos, pasobra e ora ei nos ta laat caba.
Cambionan climatologico
Na Aruba tambe nos por cuminsa riba un escala chikito. Por ehempel no cana cende luz den e cambernan y bira sali laga nan cende. Of habri e craanchi awa hancho habri djis pa laba un telep. Aunke cu gas ta barata na Aruba, no cushina tur siman un stoba cu mester herebe e carni pa oras. Ta bon cu e economia di Aruba no ta basa pa un gran parti riba fabricanan y industrianan cu ta poluciona e aire. Sin embargo a base di e grandura di nos pais, mester inventarisa tur e medidanan cu por tuma pa garantisa un clima stabil pa e proximo decadanan. Mester evita cu den futuro e daño di nos medio ambiente lo costa miyones pa reduci e efectonan. Pues nos mester ta mas racionalisa den nos conducta y custumbernan.
Por lo general por conclui cu e ser humano mester adapta su manera di biba, come y cumpra. Semper e habitantenan a custuma di gasta placa na p.e. artefactonan, paña pa bisti, articulonan di consumo cu no mester di dje directamente. Pero djis pa saca cen of pa cumpra algo pa satisface nan gana na fin di luna. Sin embargo nos tin corda riba futuro, con e chikitin nan di awendia, ki futuro nan lo tin. E autor a agrega cu p’e tabata un inmenso placer di por a contribui di e manera aki pa spierta y concientisa e pueblo Latino. Proximamente e autor lo ta na Aruba pa participa na e conferencia di CARAN na Universidad di Aruba, unda e lo duna un charla over di Idioma & Identidad.
