Despues di a termina nan estudio di Rehabilitacion Oncologico (Oncologische Revalidatie Wetenschappen) na Vrije Universiteit Brussel y De Berekuyl Academy Hulanda, 3 fisioterapista yiu di tera: Heidi Dijkhoff-Lauffer, Marlon Maduro y Marlon Thodé a mira e gran necesidad di lanta un Cancer Care Center na Aruba.
Casi 10 aña pasa sra. Annemarie Beintema Msc. a lanta un Cancer Care Center na Hulanda cu ta yudando hopi pashent di cancer riba diferente tereno.
E meta di e Cancer Care Center ta pa yuda e pashent di cancer bira vital atrobe.
Esaki ta na momento di diagnostico, prome, durante y despues di e tratamentonan.
For di diferente localidad un grupo di profesional ta duna atencion primario conhunto cu ta consisti di guia y training fisico, sosten psicosocial, conseho y guia di nutricion, ayudo di bienestar, relahacion y reintegracion.
Prome cu tratamento ta sostene e persona cu e meta pa enfrenta e temporada dificil su dilanti fisicamente y mentalmente mas fuerte posibel.
Durante e tratamento ta yuda e persona keda vital. Despues di tratamento ta guia e persona pa mantene un estilo di bida saludabel.
Si resulta cu recuperacion completo no ta posibel, e team ta para cla pa yuda mantene un calidad di bida mas halto posibel den e fase paliativo y terminal. Esaki ta ensera guia y sosten pa e pashent y su sernan keri.
Cancer y e tratamentonan di esaki tin un impacto grandi riba e salud fisico, psikico y bienestar social. Hopi pashent ta experencia problemanan, tin biaha pa termino largo.
Problemanan mas comun ta: Cansancio, reduccion di condicion, forsa y mobilidad, dolor y linfedema, miedo, depression y inseguridad, problemanan di participacion social.
Cancer Care Center Aruba ta ofrece ayudo varia y specialisa cu por alivia y resolve e problemanan aki. Manera diferente forma di fisioterapia, guia psicologico, conseho di nutricion y terapia ocupacional.
Tur esaki lo tuma lugar den cooperacion y bon comunicacion cu e specialistanan medico oncologico, otro disciplinanan y instancianan.
E profesionalnan di Cancer Care Center Aruba ta consisti di e siguiente personanan:
Marlon Thodé: Fisioterapista di edema y oncologia
Marlon Maduro: Fisioterapista general y oncologia
Heidi Dijkhoff-Lauffer: Fisioterapista di edema y oncologia
Amine Barakat: Dietista y nutricionista
Minouche Lopez: Terapista ocupacional
Audrey Kan: Psicologo clinico
Pa mas informacion por tuma contacto na:
Tel.: 588 52 38 / 582 23 12
Cel: 592 81 84
Email: [email protected]