ORANJESTAD – Awe mainta na edificio di Corte tabatin vigilancia estricto. Tanto miembronan di CEA, di KIA y hasta Polis tabata na Corte pa e caso di tiramento na e cruzada banda di misa di Noord.
ARUBA NATIVE por a compronde cu abogadonan a comparti e observacion di Hues cu mester mas investigacion, mientras cu Fiscal ta haya cu por trata e caso. Hues a ordena pa scucha tres testigo y a pospone e caso pa otro aña Februari.
TIRAMENTO BANDA DI MISA NOORD
Awe mainta e hombernan E.C.A.(25), D.S.H.(19) y E.O.(19) a presenta dilanti Hues pa tratamento di e caso di tiramento riba 5 Februari 2023, na e cruzada despues di misa Santa Anna na Noord.
Fiscal di Ministerio Publico a acusa e trio aki cu riba 5 Februari 2023 a purba mata e hombernan d C. y M., door di tira riba nan y cu M. a resulta herida. Subsidiario y osea na di dos lugar, Fiscal ta acusa nan di intento di maltrato severo. Tambe Fiscal ta acusa nan di posecion di arma di candela.
HUES TA MUSTRA COSNAN CU FALTA
Hues, promer cu cuminsa cu tratamento di e caso, a bisa cu el a sinta studia e caso y a constata cosnan cu e ta haya cu mester trece dilanti. E Hues, di Hulanda cu a bin Aruba pa atende casonan penal, a mustra cu segun investigacion Forence di Hulanda, a haya polvora di tiro riba man di e victima M. Esey ta indicacion cu M. mester a tira cu arma di candela.
Riba e auto den cual M. tabata, tin 11 impacto di bala y nada riba e otro auto. Tambe a constata cu tin dos tipo di bala o sea cu mas arma mester a wordo usa y ta solamente 1 arma a haya. E ocupante di un Mazda no a haya nada.
Hues a bisa cu mester determina si un otro a tira. Hues ta haya cu falta mas investigacion. Hues a mustra cu e homber L.M. tambe a wordo interoga pero no a haci mas investigacion. Hues ta haya cu mester investiga mas e homber M.
FISCAL KIER SIGUI CU CASO PERO ABOGADONAN NO
Hues a puntra opinion di Fiscal y e abogadonan pasobra e tin miedo cu durante tratamento di e caso lo por yega na un punto cu no por sigui mas.
Fiscal a bisa cu M. a wordo acerca pa Polis pa interogacion pero M. no a bay. El a bisa cu tabatin “regie zitting” pero ningun abogado a pidi pa mas investigacion. Fiscal a bisa cu por bien ta cu M. por a tira na un otro momento y no na e accidente. Fiscal ta haya cu e evaluacion di Hues den e caso aki lo por keda los di e caso aki y cu lo por trata e caso den su totalidad.
Abogado mr. H. Lejuez a bisa cu e ta comparti opinion di Hues, cu falta di investigacion riba M. E abogado a bisa cu segun cu el a haya mas documentonan relaciona cu e caso, e ta haya cu e investigacion no ta completo. El a bisa cu su cliente mes a bisa cu e no sa cu a wordo tira for di e otro auto. A scucha diferente tiro. Mr. H. Lejuez a bisa Hues cu ta ser bisa cu un auto blanco a bay cu cosnan. E abogado ta haya cu Polis no a investiga si den e auto tabatin arma of kico ta e otro cosnan cu por tabatin den e auto.
Abogado mr. Kuster a bisa Hues cu e ta comparti punto di bista di mr. H. Lejuez. El a remarca pakico e homber L.M. cu tabata envolvi den e tiramento, no ta den sala di Corte hunto cu e otro sospechosonan.
Abogado mr. Maldonado a remarca cu net promer cu e “regie zitting”, el a wordo apunta como abogado y e no a haya chens pa studia e caso. Awor cu el a studia e caso, e tambe ta haya e punto di bista di Hues y e otro coleganan na su lugar.
Despues di a scucha tur e opinionnan, Fiscal a puntra kende e chofer di e auto blanco ta. E acusado E.C.A. a bisa cu e auto a dal contra nan y nan a bay dal contra un muraya y el a perde conocemento. E sospechoso a bisa cu e unico persona cu lo por sa ta un tal Luis. Fiscal a bisa cu el a keda asombra cu tin deseo pa investigacion.
HUES KIER PA SCUCHA TRES TESTIGO
Hues despues di a scucha Fiscal y abogadonan a bisa cu e tin cu pensa si mester haci mas investigacion. Hues a pospone e caso pa bay pensa. Despues di un rato, Hues a bolbe y a bisa cu e pregunta ta si tin interes pa scucha hende. El a mustra cu Fiscal a remarca cu den “regie zitting” e abogadonan no a haci pregunta. Ta Hues mes a remarca cu falta cos. Hues a bisa cu ta logico cu e abogadonan lo pensa cu si Hues remarca algo, lo ta bon pa busca mas investigacion.
Hues ta haya importante pa scucha M. cu ta un di e victimanan mescos cu d C. El a mustra cu e homber G. a declara, cu nan a tira. G. tabata sinta den e MG caminda tabatin 11 impacto di bala. Hues a remarca, si loke G. ta bisa asina, por ta cu tin mas cu a tira y no solamente for di e Mazda. Hues a bisa cu e kier scucha G. y tambe L.M. El a bisa cu e ta laga Hues Comisario pa determina si M. ta wordo scucha como testigo of sospechoso. Tambe mester scucha G. pa sa unda tur e otro armanan ta. Por bien ta cu e chofer di e auto blanco por sa. Hues ta duna defensa 3 siman di tempo pa duna indicacion riba e chofer aki. Tambe e kier pa scucha L.M., kende lo por sa. Hues a pospone e caso pa dia 16 Februari 2024.