ORANJESTAD – Awe mainta den Corte di Husticia mester a trata e caso penal cu Ministerio Publico a cuminsa contra e muhernan M.H., Y.T. y e homber R.J. Ta asina cu tratamento di e caso no a sigui.
ARUBA NATIVE por a compronde cu a pospone e caso pa Januari 2024 y Fiscal tin pensa di cuminsa un caso di kita propiedadnan for di e tres sospechosonan.
E motibo cu e caso no a wordo trata, ta pasobra e abogadonan a reclama Hues cu nan a haya e documentonan for di Ministerio Publico, algun dia promer cu e caso y no a haya suficiente tempo pa studia esaki.
ACUSACIONNAN
E dama M.H. ta wordo acusa di labamento di varios suma di placa den e periodo di 1 Januari 2018 y 22 April 2022. E ta wordo acusa di incubrimento di un vehiculo y hasta un boto, den e periodo di 27 October 2021 te 30 di Maart 2022.
E dama Y.T. ta wordo acusa di labamento di sumanan di placa den e periodo di 1 Januari 2017 te 30 di Maart 2022. E ta wordo acusa di incubrimento di un auto y joyas y placa riba 30 di Maart 2022.
E homber R.J. ta wordo acusa di labamento di placa entre 1 Januari 2018 te 30 Maart 2022. E ta wordo acusa di incubrimento di e boto ya menciona, un auto y/of varios joyas y sumanan di dollars y florin.
Detayes tocante cuanto suma di placa, joyas, boto, Fiscal no a bisa nada. Tur esaki lo por spera ora di tratamento di e caso.
CASO POSPONI
Ta asina cu Hues so a hiba palabra caminda el a splica e situacion cu abogadonan a reclama cu nan a haya e documentonan mucho laat. Hues a propone cu ta pospone e caso te dia 11 Januari 2024. E dia ey e caso lo ta “regie zitting” caminda Hues kier sa si abogadonan lo kier pa haci cierto investigacion. Hues a bisa cu e kier pa dia 4 Januari 2024 tur peticionnan di e abogadonan mester ta manda pa Fiscal di Ministerio Publico. Fiscal lo manda esakinan pa Hues. Dia 11 Januari 2024 lo evalua esakinan y lo tin decision di biaha. Hues a bisa tambe cu si di parti di e abogadonan no tin ningun peticion, por considera cu no tin mester di mas investigacion. E ora ey lo bay fiha un fecha pa tratamento di e caso.
CASO PA KITA PROPIEDADNAN
Por a compronde cu Fiscal tin pensa di cuminsa caso pa kita propiedadnan for di e sospechosonan. Abogado mr. Carlo a puntra si Fiscal lo trata e caso ey hunto cu e caso di labamento di placa. Fiscal a bisa cu e caso di kita propiedadnan lo ta separa di e caso di labamento di placa.