Un sistema cu ta ekipa profesionalnan cu hermentnan pa facilita nan trabou di garantisa proteccion di nos muchanan
Dialuna 20 di November, riba Dia Internacional di Derecho di Mucha, a tuma luga e lansamento oficial di e Toolket di Codigo di Proteccion (CDP) y tambe e lansamento di un revista. Prome Minister Evelyn Wever-Croes tawata presente na e logro hopi importante aki pa nos pais.
Codigo di Proteccion ta un codigo uniforme cu tur profesional na Aruba ta bay uza y ta uzando caba desde aña 2021. Profesionalnan ta nota tur loke nan ta ripara cu ta sospechoso cu abuso den un mucha lo por ta tumando luga. E Plataforma of sistema digital aki ta wordo uza pa profesionalnan den enseñansa, den cuido di salud, den area social y den husticia. CDP ta ekipa profesionalnan cu hermentnan pa facilita nan trabou di garantisa proteccion di nos muchanan. Teniendo tur porfesional riba mesun sistema, por duna siguimento na cierto incidentenan cu por indica un abuso di mucha. “E ta yena mi cu hopi orguyo pa wak e veldnan di enseñansa, salud, social y hudicial uni den un codigo asina importante pa nos pais”, Prome Minister a expresa.
Codigo di Proteccion lamentablemente no tawata existi hopi prome. Momento cu Gabinete Wever-Croes a cuminsa goberna na fin di aña 2017, den e prome siman di trabou Gobierno a confronta cu e morto cruel di e dos angelitonan Rishandro y Eugene, dos mucha cu a perde nan bida door di abuso y violencia domestico. Na e momento ey, varios comentarionan a drenta cu a mira siñalnan di abuso den e caso aki. Lamentable tawata ta cu e siñalnan aki nunca a yega hunto un caminda pa haya e ayudo necesario cu e consecuencia grave cu dos mucha a perde nan bida. Cu Codigo di Proteccion, tur siñal ta yega un caminda, y nos profesionalnan por actua na tempo y mesora.
Banda di Codigo di Proteccion, tambe ta publica un revista pa tur professional pa asina tur profesional ta envolvi y na haltura di topiconan importante tocante proteccion di nos muchanan.
“Mi ta gradici Social Crisis Plan cu na aña 2017 a cuminsa cu e iniciativa aki na unda cu Gobierno a inverti 32 miyon florin. Gradicimento na Minister Glenbert Croes cu a cuminsa cu e Social Crisis Plan den Gabinte Wever-Croes I. Ta for di aki, Codigo di Proteccion a nace. Mi ta gradici Minister Rocco Tjon, kende como Minister di Asuntonan Social, cu su vision, pasion y dedicacion a logra esaki especialmente mantene e veldnan uni. Finalmente, mi ta gradici e ekipo chikito di Departamento di Mucha y Hoben bou di guia di señora Sue-Ann Ras. E departamento aki ta percura pa amplia e ekipo di supervisor pa asina nos tin mas soldat pa yuda nos den e lucha pa tene nos muchanan sigur. Mi compromiso ta pa tur mucha na Aruba ta safe y pa cada un tin un adulto den nan bida cu ta stima nan”, Prome Minister a enfatisa.