ORANJESTAD: Emocionante como hoben pa mira tanto expresionan di sentimento, diversificación di pasonan y dedicación di mi famia grandi di Club di Movimento, na momento cu nos tur a bini hunto pa trese dilanti loke nos a siňa durante di aňa den forma di un storia di bida.
Cu masha hopi pasenshi, e directornan di baile a trese temanan cu ta toca nos bida. E bida di mucha, nos ricibimento, e quinciaňera, prom, casamento, pero tambe situacionan doloroso cu ta concerni perdida. Perdida di sernan queri, pero tambe na momento cu un ser queri no ta reconoce nos mas dor di Alzheimer.
E topico Alzheimer ta algo doloroso y ta toca hopi di nos, pa ilustra esaki den baile tabata precioso y emocionante. Al igual e perdida di un familiar dor di accidente, penoso y emotivo pero hopi pisa den grupo, dor cu no ta fácil pa mira un compañero di baile sufri y yora su perdida cu alavez ta bira esun dibo. E baile “Lift me Up” di Riana, sigur ta bay den buki di historia pa ta un tema duro pa baila dor di e emocionan, pero bunita pa ta hunto cu bo compañero di baile y mustra unión y hermandad. Algo cu nos como hoben mester Semper hiba como prioridad.
Mas di 135 mucha y hoben deriva for di 25 grupo di baile a duna tur loke nan tabata por den esfuerzo pa trese temanan dilanti den transformacion di baile. For di Baby class, tap class, ballet , streetdance kids and teens, Latin dance y e specialidad di Acro a keda desplega como un explosion di baile, di sentimento, di emocion.
Club di Movimento no solamente a demostra calidad pero tambe den su mayoría un nivel halto di storianan humano converti den un choreografia sin igual.
Un Danki tambe na nos hermana isla Bonaire pa nan presencia den e celebracion único aki. E colaboración entre School of performing Arts Bonaire y Club di Movimento Aruba a keda funda y ta sigur cu esaki lo trese mucho mas encuentronan di intercambio. Un amistad a ser crea entre e bailadonan y e lazo di amistad aki lo ta e paso importante pa uni den arte y creación.
Club di Movimento ta conocí pa hiba nos den intercambionan Internacional y pa esey como hoben nos ta hopi agradecido pa tur e oportunidadnan aki.
Mi kier a gradici tur nos instructornan di baile, Juf. Samantha, Juf Vivian, Juf Edseline. Meneer Marvin, Juf Nicole, Meneer Ferdinand y assistant Eryan. En especial mi Juff Nicole y alavez mi dance partner cu a confia den mi.
Na tur mayornan pa nan tenacidad, empeňo y devoción na crecimiento di nan juinan cu un ternura y pasenshi pa trese nan juinan tur siman train y mas, Nos no ta nada sin boso nan y tene den mente cu loke nos ta mira boso hasi pa nos ta keda graba den nos curazon pa eternidad.
Mi ta orgulloso di mi Club, di mi compaňeronan di baile y ohala mas di nos hobenan por tuma e paso pa uni na e temprada mas excitante y valioso cu ta bo crecimiento den bida atravez di e emocionan di baile. Arte ta pa bida y e ta transforma y pacifica tur perdida, tur temponan penoso den nos formación. E ta trese amistad y ta yenabo cu un dedicación na bo crecimiento personal y ta siňabo e delicado caminda di hermandad.
Danki na tur cu a bin presencia nos dedicación, sin publico nos no por brilla. Un BIG SHOUT OUT pa e Mamanan tras si stage. Feliz fin di Aňa.
