ORANJESTAD — Diaranson 15 di November, hunto cu Presidente di Parlamento Edgard Vrolijk, Prome Minister a reuni cu señora Helen van der Wal y señor Arie Swean di Commissie Versterking Democratisch Bestel, riba independisacion di nos institutonan halto di estado.
E comision aki a wordo institui na aña 2018 pa fortifica nos institutonan halto di estado y ta consisti di algun experto riba tereno constitucional, den sector priva y den sector publico. Un comision multidisciplinario cu tin e tarea pa recomenda Gobierno con pa fortifica nos principionan democratico. Nos ta fortifica democracia ora nos organonan y institutonan halto di estado ta fortifica. Mas fuerte nos institutonan Parlamento, Raad van Advies y Contraloria General (Algemene Rekenkamer) ta, miho nan por controla gobiernonan y mas fuerte nos democracia ta.
Prome Minister Evelyn Wever-Croes a remarca cu desde el a drenta gobernacion, el a cuminsa cu e proceso di independisa Raad van Advies, Algemene Rekenkamer y di Parlamento. Independisacion di nos colegionan halto ta necesario pa asina nan no depende di Gobierno y por duna conseho y veredictonan obhetivo cu lo yuda democracia di nos pais.
Raad van Advies ya a wordo independisa y ta bayendo bon. Awor lo cuminsa cu e proceso pa independisa Algemene Rekenkamer. Parlamento ta den estado bastante avansa caba. Un Parlamento mas independiente y fuerte por haci e trabou di control miho riba un gobierno y lo tin un bon democracia pasobra e ora tin checks and balances.
Un gobierno cu no kier un democracia fuerte, ta percura pa su Parlamento, Raad van Advies, y su Contraloria General ta swak. Gabinete Wever-Croes kier e institutonan aki fuerte y fortifica y ta logrando esaki tambe.