ORANJESTAD – Awe, 16 di November, Scol Preparatorio Tarcisius ta cumpli 70 aña di existencia. Prome Minister Evelyn Wever-Croes tabata presente na e celebracion special aki, pa den nomber di Minister di Enseñansa Endy Croes, felicita y gradici tur esnan cu a, y ta labora na e scol, cu 70 aña di amor y dedicacion na nos muchanan. Prome Minister a indica cu e trabou di tur esnan den enseñansa ta uno grandi, y di aprecia, mirando cu nan ta esunnan, cu tin un influencia grandi, riba desaroyo di nos hobennan. E muchanan ta wordo inspira door di e maestronan aki, pa siña, pa mayan nan por tin un miho futuro. E ta un orguyo di por wak bek cuanto alumno a bishita e scol aki durante tur e 70 añanan, y di sa cu hopi awe, tin un bon educacion y futuro stabiel.
Prome Minister tambe tabata tin e oportunidad di combersa cu e cabesante actual Juffrouw Angela Romero, y cu e ex cabesante cu tabata Juffrouw Monica. El a gradicinan pa tur nan esfuerso y dedicacion, pa cu educacion di nos muchanan.
Cabesante di scol, juffrouw Angela Romero, na su turno a gradici Prome Minister pa asisti na e celebracion importante aki, na unda e muchanan a haci un presentacion, cu nan a prepara cu hopi amor, hunto cu nan maestronan. Juffrouw Romero tambe a gradici tur esnan cu tabata presente, y e maestronan cu semper a duna tur di nan banda pa educa e muchanan, y den e caso di awe mainta, a train nan pa duna un excelente presentacion. Tambe, el a gradicinan pa tur e 70 aña, cu un trayectoria bunita di educacion, amor, cuido, y di norma y balor, cu tin tras di lomba. Juffrouw Romero a despidi, sigurando tur presente cu nan lo sigui traha sigur pa 70 aña mas, cu hopi amor y dedicacion na educacion di tur e muchanan.