Parlamentario Ricky Hoek (MEP): Comision Labor ta enfoca riba regulacion di desempleo y sistema di seguridad social

ORANJESTAD, Aruba, 13 November 2023: Parlamentario Ricky Hoek den su funcion di presidente di Comision fiho di Labor di Parlamento di Aruba ta duna un relato encuanto un reunion riba e ‘Propuesta di Reforma di Pakete di Pais’ (hervormingsvoorstellen Landspakket). 

Contenido di Pakete di Pais 

E pakete di pais ta reparti den 8 diferente tema poni bou di e letternan A te cu H, entre otro: maneho financiero, reforma economico, cuido y educacion. Tema E cu ta e ‘Reforma Economico’ tin dos obhetivo. Un di nan ta pa realisa un sistema di siguridad social solido y pagabel cu ta pone incentivo na e luga corecto. Comision fiho di Labor ta enfoca su mes mas riba tema E. 

Regulacion di desempleo y sistema di seguridad social

Un di e puntonan cardinal cu a bin dilanti durante di e presentacion, tabata e regulacion di desempleo cu ta cay bou di tema E ‘Reforma Economico’. Na april di e aña aki, Departamento di Labor a sigui traha riba e ‘regulacion di desempleo’. Segun Departamento di Labor, ta importante pa bin cu un plan pa fortalece e seguridad social na Aruba. Por ehempel, den caso cu un persona perde trabou na e momento aki, y e no logra haya un otro, e lo mester haci peticion pa ricibi bijstand. 

Pa evita cu personanan ta bay den e sistema di bijstand, a propone e idea pa introduci un ‘Fondo di Seguridad Social’ caminda e prima di cessantia por bay aden y ta uza esaki na momento di desempleo. A base di combersacionnan cu e ekipo di gobierno ta hibando cu diferente stakeholder riba e tema di labor, a bin un proposicion riba mesa. E idea pa un ‘Fondo di Seguridad Social’ ta parce di tin e sosten di tanto e dunadonan di trabou como tambe e sindicatonan.  

Trabou di Parlamento

Parlamentario Ricky Hoek a puntra tanto na Minister di Labor y Departamento di Labor kico ta e siguiente pasonan. Di parti di gobierno a duna di conoce cu a base di investigacion existente y/of adicional, lo desaroya y implementa un proposicion pa cu e sistema di seguridad social. 

Por ultimo presidente di e comision Sr. Hoek, ta vocifera cu mediante reunionnan structural di e Comision fiho di Labor, Parlamento di Aruba lo sigui controla e proceso y desaroyo di e pakete di pais pa e lunanan nos dilanti.