Como parti di e agenda di reunion cu lider di Partido di Pueblo Arubano (AVP) a hiba na Hulanda, mr. Mike Eman a reuni diahuebs cu lider nobo di CDA, Henri Bontenbal na sede di e fraccion den Tweede Kamer na Den Haag. Ta prome biaha cu nan a sinta cu otro.
E politico Hulandes a keda encanta cu e bishita di e politico Arubano y mas ainda cu e proposicion cu a haya di Eman pa bin cu un Sociaal Cultureel Plan na Aruba pa duna un miho bista di kico ta e situacion social riba nos isla.
Esaki ta un punto cu ta cuadra hopi cu e filosofia di CDA, specificamente cu e aspecto di e siguridad di un bida digno cual ta un tema cu ta enfocando hopi riba dje na Hulanda ultimo tempo. Tanto AVP, como CDA ta di ideologia Social Cristian.
Ambos a intercambia di punto di bista riba e futuro di nan respectivo pais. Bontenbal ta considera importante pa a topa cu Eman y mantene un comunicacion pa sa kico ta pasando na Aruba y vice versa. “Ta hopi importante pa nos inverti den e relacion aki,” e politico Hulandes a expresa.
E ta kere cu ta importante pa garantisa un standard minimo di biba. Esey ta nifica cu mester por tin acceso na vivienda y na un trabou digno, entre otro. Pa medio di un Sociaal Cultureel Plan Bureau en berdad bo por wak e circunstancia di bida na Aruba. “Nos a ricibi e proposicion y nos ta bay studi’e pa wak con nos por aporta na dje,” Bontenbal a bisa.
Definitivamente por a ripara cu e lider di CDA a capta e pensamento y vision di Mike Eman, esta cu no mester wak djis na e cifranan di crecemento economico of di presupuesto nacional, pero tambe mester paga tino riba con ta bayendo cu e ciudadano comun y kico tin mester di berdad na Aruba.
Aunke tin eleccion aki dos siman na Hulanda, e politico Hulandes a sigura cu e proposicion di AVP pa un Sociaal Cultureel Plan Bureau na Aruba ta riba su lessenaar y e lo pasa door di dje cuidadosamente hunto cu e proximo fraccion pa asina determina pasonan pa tuma.