ORANJESTAD – Awe mainta Hof di Corte Superior a ordena pa laga e acusado Walkidia Winterdaal di inmediato liber. Walkidia den Corte den Promer Instancia a wordo haya complice di e asesinato cruel di Frans Angela y a wordo condena hunto cu Jafel Cabrera Baez na 18 aña di prison.
ARUBANATIVE por a compronde cu Dialuna 6 November 2023, tratamento di e apelacion a tuma lugar den oranan di merdia y awe Hof ya a dicidi cu mester laga Walkidia liber.
Abogado mr. Zara a representa e dama Dominicana Walkidia Winterdaal mientras cu mr. Canwood a representa e homber Arubiano Jafet Cabrera Baez.
APELA CONDENA DI 18 AÑA DI PRISON
Ta asina cu tanto Jefat como Walkidia a apela nan sentencia di 18 November 2022, caminda Hues a haya nan culpabel di a asesina Frans Angela na un forma cruel y a condena ambos na 18 aña di prison.
E lamentable incidente aki a conmove henter comunidad. Dia di tratamento di e caso, Fiscal a bisa Hues cu Jafet y Walkidia a asesina Frans Angela 79 aña na un forma hororoso. A drei e garganta y kibra nek, a pasa auto riba cabez y curpa di e victima. Fiscal a bisa cu segun patologo, Angela a sufri masha hopi pasobra posiblemente ainda e tabata na bida ora a pasa auto riba dje y e no por a haci nada pa defende su mes. Fiscal a tuma na malo con na un forma hororoso a mata e victimia. El a mustra con Jafet a splica den detayes con el a drei garganta y kibra nek y despues pasa auto. Fiscal a exigi pa Jafet 25 aña di prison y pa Walkidia 22 aña di prison.
Dia 18 November 2022 via video conference, Hues a bisa cu e ta haya legalmente proba cu Jafet y Walkidia premedita a asesina señor Angela.
ASESINATO CRUEL
Hues a bisa cu pa cu e castigo, e ta tene cuenta cu e forma cruel cu a mata Angela. Hues a bisa cu e no por imagina con e ultimo minuut di bida di Angela tabata. Tambe Hues a bisa cu e pareha a laga famia di e victima cu tristeza.
HUES A BAHA CASTIGO EXIGI
Hues a bisa cu e tambe ta tene cuenta cu e raportnan di psychiater cu ta haya Jafet y Walkidia menos responsabel pa loke nan a haci.
Hues a condena Jafet y Walkidia na 18 aña di prison.
HOF A ORDENA PA LAGA ACUSADO LIBER
Por a compronde cu abogado mr. Zara den su defensa a bisa Hof cu e no ta haya cu Walkidia ta complice di e asesinato cruel. E abogado a pidi pa laga Walkidia liber.
Ayera mainta, dos dia despues di tratamento di e caso den Corte Superior, Hof a manda un orden pa di inmediato laga Walkidia den libertad pasobra Hof no ta haya cu tin motibonan di peso pa e keda encarcela.
Ta asina cu Ministerio Publico por apela e decision aki. Tempo lo mustra si esey lo sosode. E ora ey ta Corte di Casacion na Hulanda lo atende e caso. Pero esey lo no trece cun’e cu Walkidia lo mester bolbe worde encarcela na KIA pendiente e caso den casacion.