ORANJESTAD – Siman di Festival di Buki ta wordo celebra tur aña, como un manera pa stimula e muchanan riba e importancia di lesamento. E aña aki Siman di Festival di Buki ta celebrando su di 31 edicion, titula; Mi Buki, Mi Cas. Prome Minister Evelyn Wever-Croes riba e siman aki, kier enfatisa con importante e ta pa nos muchanan, cu ta nos futuro generacion, sa di tur e beneficionan cu lesamento tin pa nan. Un mucha cu ta lesa buki, ta siña conoce otro luganan, otro aventura, y alabes engrandece su vocabulario, cu ta aporta grandemente na su educacion.
“Como mandatario di pais Aruba, e ta nos responsabilidad hunto cu e mayornan, pa stimula nos muchanan, pa asina nan por haya mas placer den lesamento. Mayornan por hiba nan yiunan Biblioteca Nacional cu tin un gran variedad di diferente buki, pa diferente edad. Aki nan por scohe pa lesa riba topiconan cu ta di mas interes pa nan, haciendo asina, e lesamento mas agradabel.
Mi ta pidi tur mayor, pa encurasha e muchanan pa lesa mas, pa asina nan por pasa den aventuranan bunita den nan bida, y alabes yudando nan vocabulario crece, creando asina mas oportunidad pa nan” Prome Minister a expresa.