Den nomber di Minister di Cultura Xiomara Maduro, a otorga reconocemento na dos baluarte pa mantene y promove cultura di Aruba, Sr. Miguel van der Linde y Sr. Frank Croes.
ORANJESTAD: Recientemente, Minister di Enseñansa y Deporte Endy Croes a presencia e di seis (6) edicion di Fiesta Tipico di Bario na Centro di Bario Savaneta. E intencion di esaki ta pa den cada evento den bario, duna reconocemento na esnan cu ta sostene, promove y mantene nos folklore bibo den e barionan. Den nomber di Minister di Cultura Xiomara Maduro, a reconoce dos baluarte pa nan contribucion pa mantene y promove nos cultura. E prome persona cu a ricibi un reconocemento ta Sr. Miguel van der Linde, kende pa mas di 5 decada, a deleita nos cu musica di Paranda di Fin di Aña, Dande y Mariachi. Sr. Miguel van der Linde a nace dia 20 di augustus di aña 1957 na Aruba y ta bini di e bario di Savaneta. Cu 8 aña di edad Sr. Miguel a siña toca cuarta y cu su 9 aña el a cuminsa pasa paranda den cercania di su cas. Desde e tempo ey te dia di awe, Sr. Miguel ta pasa paranda di Noche Buena y Dande pa asina deleita un y tur riba diferente instrumento of como cantante. Na aña 1970 na momento cu Sr. Miguel a cumpli 13 aña, el a integra den Mariachi Perla di Aruba y awendia ta e persona cu ta maneha e grupo. E di dos persona kende a ricibi un reconocemento den e ocasion aki tabata Sr. Frank Croes cu pa di 6 decada a deleita nos cu su talento musical riba sofonia di boca y pa conserva Aruba su cultura y tradicion musical di antaño. Sr. Frank Croes a nace dia 2 di october 1951. Desde su 7 aña di edad, Sr. Frank Croes a cuminsa toca sonfonia di boca. Sr. Frank a nace cu un don y a siña maniobra e sonfonia di boca riba su mes. Grupo Tipico Pagasaya, cual Sr. Frank ta dirigi, un di nan carateristicanan ta cu nan ta un di e poco gruponan na Aruba cu te ainda ta conserva e uzo di sonfonia di boca den nan musica. Sr. Frank y su Tipico Pegasaya ta consisi di 9 pa 10 tocado, un grupo musical cu a keda conserva e cultura y tradicion musical di antaño di Aruba, manera Dande, Dera Gay y nos dushi folklore. Minister Endy Croes a gradici Fundacion Union di Tipiconan Rubiano pa e bunita iniciativa pa tene nos cultura di musica tipico bibo. Tambe, a aplaudi tur grupo tipico cu a presenta den e Fiesta Tipico di Bario. “Den nomber di Gabinete Wever-Croes II, masha pabien na ambos baluarte pa nan bunita trayecto, cu a aporta varios aña den e mundo di musica y na nos cultura”, Minister Endy Croes a expresa.
