Lider di AVP, mr. Mike Eman tabata invitado especial den cede di TNO na Utrecht pa e symposium technologico di TNO dedica na Jan Ebbing cu tabata e kwartiermaker y promer director di TNO Aruba na ocasion di su jubileo cu lo drenta na vigor 1 januari 2024.
Hunto cu Eman e ingeniero Ebbing a juda pone Aruba riba mapa e tempo ey como lider den innovacion y green vision. Pesey Eman a worde invita pa dedica un mensahe na Jan Ebbing durante e symposium di dedicacion aki. Eman a recorda e momentonan cu a logra trece TNO na Aruba y con liher e instituto aki di “research y development” a desaroya y trece un cantidad di ingenieronan y profesionalnan academico Arubano bek cas pa traha den e instituto aki.
Jan Ebbing, obviamente conmovi cu e palabranan di elogio y reconocimento di e Promer Minister cu a trece Aruba, a recorda cu hopi nostalgia su experiencia na Aruba y admiracion pa e vision di Mike Eman y su dedicacion 24/7 na progreso di Aruba.
Den combersacion cu Ebbing, e ta recorda claramente cu e enfasis di e acuerdo cu a haci e tempo ey cu Premier Eman tabata pa desaroya e pilar economico di conocemento, fomentando asina e exportacion di conocemento for di e profesionalnan local.
“Mi ta kere cu esey ainda ta hopi importante pa e isla y sigur pa Aruba keda purba alcansa e metanan ey,” Ebbing a bisa indicando cu e ora ey ta necesario tin socio pafo, por ehempel, den Reino caminda tin e conocemento y e base pa coopera. “Esey ta parce mi ainda sigur util pa Aruba. Pero mi ta pensa tambe cu pa Hulanda ainda ta interesante pa traha cu un isla manera Aruba.”
Smart Community ta un ehempel di proyecto cu a ehecuta uno relativamente igual na Hulanda, na e ciudad di Rotterdam. E ta un bario chikito den e area di waf caminda tambe a enfoca riba sostenibilidad. Ebbing ta duna credito di e exito di dicho proyecto na e conocemento y experiencia cu a adkiri mientras tabata na Aruba durante Gabinete Mike Eman I y II. Aki a ripara, entre otro, cu pa alcansa un economia totalmente berde, e almacenamento di energia ta crucial. “Esey nos a siña hopi bon na Aruba, con pa ta prepara pa esey,” el a expresa.
Confirmando e importancia di traha cu entidad di conocemento, Ebbing a resalta cu semper mester tin un interes en comun unda cu bo por siña algo di e organisacion cu bo ta traha cu ne y e pais unda cu bo ta tambe por siña algo; cu hunto por alcansa meta. Den su discurso durante e symposium Ebbing a lamenta e cierre di TNO Aruba.
E a duna Mike Eman un mision pa rebiba e momentonan di exito aki. Ebbing ta convenci cu ta importante pa reanuda dialogo cu organisacion pa wak si por yega atrobe na un cooeracion mutuo. “Mi ta kere cu pa tur hende lo ta bon si Aruba ta sigui riba e caminda di sostenibilidad y ta un ehempel den e region,” e ex director di TNO a conclui bisando.