Dialuna atardi durante un Conferencia di Prensa Comision Celebracion Dianan Nacional y Ministerio di Cultura a anuncia cu recientemente nan a ricibi e carta oficial di Sinterklaas cu e fecha y orario cu nan lo yega Aruba.
Sinterklaas y Pietnan ta hopi contento cu un biaha mas nan ta bishita Aruba pa saluda y laga regalo y mangel pa tur mucha. Sinterklaas a informa cu e aña aki e te yega Aruba riba bispo di celebracion di “Dia Internacional di Derecho di Mucha”, diadomingo 19 di november y debi na e situacion di tempo nan lo yega Aruba pa exactamente 3’or di atardi na e entrada principal di APA.
Despues cu e Sinterklaas y Pietnan wordo ricibi pa Minister di Finansas y Cultura mr. Xiomara Maduro lo sigui un parada riba L.G. Smith Boulevard acompaña pa Massive Brassband, Musica, Grupo di Pitbull Productions y Guccie Dancers cu lo duna presentacion di baile y canta riba e ruta hunto cu tur e pietnan di colo. E parada lo wordo anima pa Tanchi Esmee cu lo percura pa tur e alegria riba caminda resalta den un ambiente unico yena cu colo y fantasia.
Pa 4:30pm e show di mucha ta cuminsa riba Renaissance Market Place anima pa Tio George cu diferente gruponan di baile y artistanan infantil. Mientras cu show ta cuminsa tur mucha lo por warda Sint y su Pietnan na Renaissance Market Place pa saca potret den un bunita photobooth cu lo wordo crea. Renaissance Market Place ta percura pa tur mucha haya gratis “pop corn” y “cotton Candy”. Tambe lo tin Dino Jump pa nos muchanan por disfruta e dia bunita aki.
CCDN kier a gradici na Sra. Ruth Gaarie y Pitbull Productions pa e bunita cancion dedica na e celebracion di Sinterklaas y Piet titula ‘Sint y Piet trece colo’ cu pronto por wordo scucha na tur radio emisora. Danki special na Departamento di Cultura, Ministerio di Cultura, Unoca, Aruba Bank, Renaissance Market Place, APA, DOW, Rode Kruis y Cuerpo Policial cu un biaha mas ta haci e bishita di Sinterklaas y Pietnan posibel na Aruba.