ORANJESTAD: Diabierna atardi, duranta Conferencia di Prensa di Gobierno di Aruba Minister Endy Croes a presenta Premio Excelencia den Deporte (PED) 2022. Presente na e ocasion aki tabata vice presidente di Parlamento Sr. Raymond Kamperveern, Parlamentario Sr. Alvin Molina, directiva di diferente federacion, IBiSA, FFD, FLPD, SSA, Departamento di Enseñansa, Inspectie Onderwijs, atletanan nomina y demas invitadonan special.
Premio Excelencia den Deporte ta reconoce e atletanan cu mas a destaca den nan disciplina durante aña 2022. Pa aña 2022 un total di 29 federacion a manda nomber di nan atletanan cu mas a destaca. E nominadonan ta wordo reconoci dia 10 di november den un anochi di gala dedica specialmente na nan. Minister Endy Croes a enfatisa cu e aña aki e interes tabata hopi grandi, unda cu 29 federacion a manda oficialmente nan nominadonan conforme e rekisitonan. Un total di 130 atleta ta nomina den diferente categoria pa aña 2022.
Comision di hurado:
E comision encarga pa scoge e ganadonan ta consisti di cinco profesional cu tin e afinidad den prensa deportivo. E rekisitonan pa saca e ganadonan ta basa riba e siguiente reglamentonan: 1. prestacion local, 2. prestacion internacional y 3. prestacion den comunidad di Aruba.
Un premio nobo:
Pa prome biaha ta introduci e categoria entrenado di aña unda cu lo reconoce 27 entrenado pa nan contribucion den e desaroyo di deporte di Aruba.
Ceremonia oficial:
Durante e ceremonia di gala cu ta tuma luga dia 10 di november proximo den Renaissance Convention Center lo otorga diferente premio, entre otro, medaya y certificado pa tur e 130 nominadonan, plakkaat pa e 13 ganadonan, plakkaat pa e 27 entrenadonan, plakkaat na e 10 baluartenan deportivo y premionan efectivo. Durante e anochi special aki lo rindi homenahe na 10 baluarte deportivo cu a dedica gran parti di nan bida den deporte di Aruba. Tambe, 7 atleta olimpico lo ricibi un certificado y pin for di World Olympians Association pa nan esfuerso haci pa promove e balornan olimpico.
Pa finalisa, Pueblo di Aruba ta keda cordialmente invita pa sintonisa e anochi mas grandi den deporte di Aruba dia 10 di november cuminsando pa 8or di anochi en bibo via nos planta nacional Tele Aruba y Canal 22.
