ORANJESTAD, Aruba 2 di November 2023: Ta un hecho cu ora di papia di asuntonan cu ta regarda maneho di un pais, mester bin cu cifranan y hechonan concreto. No solamente papia riba nan, pero mustra concretamente resultadonan di maneho financiero. Esaki ta loke Parlamentario Louisette ‘Setty’ Christiaans-Yarzagaray di Fraccion di MEP ta haci ora cu e elabora riba topiconan asina importante den su funcion di Parlamentario.
Yarzagaray a referi na un par di tema den conferencia di prensa dialuna mainta y esakinan tin di haber cu resultadonan di decisionnan tuma door di Gabinete Wever-Croes. Na prome lugar el a indica cu Parlamento a ricibi e ‘Uitsvoeringsagenda’ di kwartaal cuater di 2023 caminda ta raporta na Parlamento e progreso di Landspakket cu a finalisa den un ‘onderlinge regeling’ hunto cu Corsou, Sint Maarten y Hulanda.
E Parlamentario a bisa cu hopi di e componentenan di Landspakket ta investigacion, procesonan cu mester wordo cambia y den sector gubernamental hopi departamento ta sinti esaki tambe caba y ta wak algun di e efectonan aki afo.
Por ehempel, ora cu Departamento di Recurso Humano (DRH) a cuminsa ofrece cursonan adicional pa asina e empleado publico por capacita su mes miho pa asina e no keda solamente eherce su funcion, pero amplia su mes y crece den su trabao, a señala.
Christiaans-Yarzagaray a agrega cu tin hopi aspecto cu ta tumando luga pareu y na final e parti positivo ta Aruba, compara cu Corsou y Sint Maarten, ta esun cu tin mayoria di e puntonan aki of den proceso of cu el a finalisa caba. Algun tin cu caba den 2024 y masha poco punto den 2025.
E conclusion ta cu Landspakket a cuminsa den un formato di Rijkswet cu tabata COHO y aworaki por wak con Aruba ta cumpliendo.
“Nos pregunta cardinal ta, comparando e tres islanan, si Aruba ta miho para dicon su porcentahe cu Hulanda a firma un acuerdo cu ne pa locual ta trata e ‘liquiditeitssteun’ cu a bira un fiansa na final di dia, ta esun cu tin porcentahe di 6.9%? Siendo cu Aruba ta esun cu ta bezig ta progresando miho pa locual ta trata e ‘Uitvoeringsagenda’ cu ta trata e contenido di e Landspakket”, el a cuestiona.
Finalmente, e Parlamentario a pone enfasis riba e desigualdad pa cu Aruba, ya cu como pais ta purba di haci lo miho y na final di dia e resultado ta cu Aruba a haya un straf di un interes asina halto.