ACAPULCO: Arizbeth Dionicio Ambrosio tabata realisando trabounan di rescate na e ciudad Mexicano di Acapulco despues di e pasada devastador di horcan Otis, ora cu el a tende di leu e lamento di un baby.
Un tiki despues, e oficial di polis di 33 aña y mama di dos yiu a tende atrobe e lamento y a dicidi investiga for di unda e lamento tabata bin.
Na e momento ey, el a topa cu e mama di un baby di cuater luna cu tabata tin mester di yudansa. E mama a bisa cu su yiu no a haya niun alimento pa mas di dos dia y cu e tabata yora di hamber.
“Mi a bis’e cu si e tabata kier, ya cu mi ta dunando mi yiu pecho, cu mi por a duna e baby un tiki”, e oficial a conta.
E gesto a wordo captura riba un potret difundi den fin di siman pa e Secretaría de Seguridad Ciudadana (SSC) di Ciudad de Mexico, cu a manda pa Acapulco varios ekipo di rescate.
E potretnan a genera reaccionnan emotivo di apoyo den e redman social, meymey di e tragedia cu Acapulco ta bibando despues di pasada di e horcan.