ORANJESTAD – Diaranson mainta Minister di Husticia y Asuntonan Social sr. Rocco Tjon tawata presente na post Tango pa asina sera conoci cu e klas nobo di Brandweer cu a inicia. Un momento sumamente bunita, caminda a yama e hobennan aki un bon bini na e Cuerpo nobo. Ta trata di un grupo cu ta bay reenforsa Cuerpo di Bombero, mirando cu tin falta di personal, pa cual motibo a inicia cu e opleiding aki. Banda di esaki a haya un splicacion tambe tocante e tres trucknan nobo cu Brandweer a ricibi recientemente.
Importante pa menciona ta cu den presupuesto 2024, a incorpora un fondo di crecemento, pa di e forma ey por sigui fortifica henter e cadena hudicial, entre otro Brandweer pa asina nan por adkiri mas personal e aña binidero. Esaki ta un comienso bunita, pa asina reenforsa e Cuerpo importante aki.
Na mes momento, a haya un splicacion pa loke ta e tres trucknan completamente nobo cu a yega Aruba siman pasa. Den e simannan nos dilanti, e ekipo di Merca lo ta biniendo Aruba pa asina duna un splicacion amplio tocante e funcionalidad di e trucknan aki na henter e comicion di Brandweer. A base di esaki por inicia cu e trainingnan pa e personal, pa loke ta e funcionalidad di e trucknan nobo. Tambe, e proceso pa sigura e trucknan aki, ta caminando.
Ministerio di Husticia y Asuntonan Social a inverti hopi e ultimo dos añanan aki den e departamento di Brandweer. Manera ta conoci, a renoba e post di San Nicolas por completo, a percura pa tur material nobo pa e personal por traha bou di condicionnan mucho mas sigur pa nan mes y eherce nan trabou optimalmente, tambe a ricibi trucknan nobo aña pasa y e aña aki. Ademas di esaki, por a tuma nota di e proyecto di mas nobo cual lo ta e renobacion por completo di e post na Airport, cual aworaki a inicia, mirando cu e fondonan a wordo aloca a base di e tremendo maneho financiero cu a wordo hiba e aña aki.
Un momento sumamente positivo pa Brandweer Aruba, pa loke ta trata e opleiding, cual manera a wordo indica ta e prome klas, pero otro aña lo tin mas personal cu lo bay reenforsa e departamento aki. Un pabien na e ekipo di Brandweer Aruba cu e iniciativa aki.
