ORANJESTAD – Den cuadro di e proyecto cu a wordo lansa pa Departamento di Progreso Laboral, den cooperacion cu Departamento di Asuntonan Social y Centro di Hoben y Famia, cu apoyo di Minister di Asunto Social Colega Rocco Tjon, pa inverti den capacitacion di personanan cu ta en busca pa drenta e mercado laboral, a entrevista sra Madeline Ridderstap di Departamento di Asuntonan Social pa haya un miho bista di e contribucion di nan banda pa cu e proyecto aki. Sra Ridderstap a indica, cu den e ultimo añanan Gobierno y departamentonan social y di labor hunto cu otro instancianan ta poniendo hopi atencion pa yuda esnan cu ta en busca di un trabou, guiando nan door di ampliando nan capacidad pa cu conocemento propio. Esaki lo yuda grandemente pa nan siña conoce nan mes, nan habilidadnan personal y nan norma y balornan.
Sra Ridderstap a indica cu lo mas importante ta pa cada participante sa kico nan mes kier den bida, ki trabou nan ta desea y con nan ta mira nan perspectiva pa futuro. Siguiendo e sesionnan aki, nan por descubri ki habilidad y talento nan ta posee, kico ta nan insiguridadnan y kico nan kier siña y aspira. El a sigui splica cu hopi biaha tin e pensamento cu desaroyo personal ta algo cu cada persona tin cu purba di practica, pero si nan no tin e habilidad necesario, nan merece un chens pa wordo motiva y empodera pa haci esaki.
E punto di e capacitacion di e trayecto ta pa cada participante practica y reflexiona riba locual cu e ta desea di haci. Analisis y literatura cientifico a demostra cu atencion y combersacion, ta motiva otro. Trayectonan di desaroyo, siñamento y guia intensivo por yuda e cliente durante cu e ta en busca di un trabou pero tambe pa e wordo re-integra den e tereno laboral.
Sra Ridderstap a indica cu Departamento d Asuntonan Social lo bay duna atencion durante e sesionnan aki na e importancia di aprecio propio, aumenta confiansa, stimula responsabilidad propio y tambe motivacion interno. Minister di Labor Glenbert Croes ta gradici tur esnan envolvi den e trayecto aki, pa nan esfuerso y dedicacion na yuda esnan cu mester di un trabou.
