ORANJESTAD – Recientemente, durante un conferencia di prensa organisa pa FUTURA, Prome Minister Evelyn Wever-Croes hunto cu Minister di Enseñansa Endy Croes, a anuncia cu e proyecto importante di innovacion EduTech Fund, lo continua. E proyecto di innovacion aki, a yuda un total di 12 scol na Aruba, adkiri nan materialnan digital, facilitando e maestronan den nan sistema di duna les, y haciendo enseñansa mas atractivo y agradabel pa e muchanan.
Prome Minister a indica cu e prome aña di EduTech tabata un exito total, mirando cu FUTURA a ricibi un total di 50 aplicacion di scolnan cu ta interesa pa participa. Esaki sigur ta muestra di e potencial grandi cu e proyecto aki tin, y e deseo di e scolnan, pa crea un ambiente innovativo na scol. Durante e prome aña di EduTech, Gobierno a inverti e suma di Afl. 415,000 pa cumpli na duna e 12 scolnan ganado nan materialnan digital, cu nan a gana. Esaki sigur ta un muestra grandi cu pa Gabinete Wever-Croes II, enseñansa ta un prioridad.
Mirando e interes grandi di parti di e scolnan pa participa na e proyecto di innovacion aki, y e resultadonan positivo cu e proyecto aki a trece cu ne den e prome aña, Gobierno di Aruba a tuma e decision pa aloca un suma di 400 mil florin pa e proyecto aki por continua, dunando asina oprtunidad na mas scol pa por gana materialnan digital necesario pa yuda eleva nan sistema di enseñansa.
Pa admira e fruto cu e proyecto aki a duna, y pa mira e dedicacion cu cada scol tin pa cu innovacion den enseñansa, Prome Minister, a bishita diferente scol, mirando asina, e trabounan di innovacion cu cada scol a haci y ta haciendo. Durante su bishita, Prome Minister por a nota con importante e proyecto aki ta, den stimula innovacion, tecnologia, y interactividad den e scolnan na Aruba.
“Mi a keda sumamente impresiona, di mira e creatividad cu cada scol a desplega pa a gana e proyecto di innovacion. Mi ta gradici tur scol cu a aplica na e iniciativa di EduTech, y pa diseña y aplica cu un concepto diferente. Nos di Gobierno ta orguyoso di EduTech como cu ta e propio maestro/maestranan di cada scol ta diseña e proyectonan, identificando retonan y oportunidadnan cu kisas un ‘outsider’ no lo por. Danki pa kere den innovacion, y pa e esfuerso pa por eleva educacion na Aruba, y e experiencia di e studiante y maestro/maestranan den klas. Danki pa kere cu innovacion ta e yabi pa nos sigui. Mi ta gradici tambe Minister di Enseñasa Endy Croes cu semper ta cla pa permiti nos y yuda den e proyectonan aki” Prome Minister a expresa.
Pa mas informacion y pa aplica por bishita e website www.edutecharuba.org
