ORANJESTAD: Diabierna ultimo, Minister Endy Croes a presencia ceremonia di apertura di e di dies (10) edicion di Caribbean 35 plus Women Softball Tournament organisa pa Splash Aruba Softball Team. Un total di ocho (8) ekipo di, entre otro, Curaçao y Boneiro, Hulanda, Sint Maarten y Aruba a bataya pa conkista e titulo maximo. E campeonato a inicia diahuebs y a termina diadomingo na Aruba Juniors Ballpark. E aña aki e campeonato internacional ta dedica na tres (3) baluarte cu merecidamente a ricibi un bunita homenahe; Sra. Hetty Hertz, Sra. Dora Tina Luydens y Sra. Helene Vrolijk. Durante e ceremonia Minister Endy Croes a hiba palabra den nomber di Gabinete Wever – Croes II unda el a desea e ekiponan exito. Tambe, Minister Endy Croes a expresa cu deporte ta trece nos hunto y ta enfatisa cu ta importante pa tene e balornan olimpico semper presente, cual ta excelencia, amistad y respet. “Tin respet pa bo mes, respet pa otro, respet pa e reglanan di wega y respet pa e ambiente deportivo”. Mandatario di Deporte a expresa. Pa conclui, Minister Endy Croes ta felicta e baluartenan y ta gradicinan pa tur loke cu nan a haci pa e deporte di softball na Aruba. Alabes e mandatario di Deporte ta felicita e organisado- y boluntarionan cu un bunita y exitoso campeonato. Pabien na e ekipo ganado Rising Phoenix y sub campeon Treasure New Era.
