Prome Minister Evelyn Wever-Croes ta na Hulanda pa un bishita di trabou cortico pero intenso cu diferente reunion y compromiso di trabou. Diamars, Prome Minister hunto cu Minister Plenipontenciario na Hulanda, señor Ady Thijsen, a reuni cu Secretario di Estado Alexandra van Huffelen hunto cu su delegacion. Premier Wever-Croes a expresa cu e tawata un bon reunion na unda varios tema di relevancia pa Aruba a wordo trata. Gobierno di Aruba y Hulanda ta na mesa ainda pa purba yega na e miho interes pa pais Aruba.
Prome Minister a duna di conoce cu hunto cu Arubahuis lo kier cambia e ley di supervision financiero y pa esaki Gobierno mester di aprobacion di Conseho di Minister di Reino y di Secretario di Estado. E procedura aki ta debi na un protocol cu e Gobierno anterior di AVP a firma na aña 2015. Den e protocol aki a wordo palabra cu e ley di supervision financiero por wordo cambia solamente si BZK y Conseho di Minister di Reino duna nan aprobacion.
“Nos ta den e proceso pa cambia esaki pa motibo cu e normanan den e ley ta anticua y ta importante pa Aruba pa update esakinan, y Gobierno ta na mesa cu Hulanda pa e cambio tuma luga. Hulanda a trece dilanti condicionnan y a hiba conbersacionnan riba esakinan. Y mi tin fe y confiansa cu nos lo sali afo di esaki tambe. Manera tur e otro reunionnan cu a tuma luga e siman aki na Hulanda, e tawata un bon reunion na unda cu Gobierno ta buscando aternativanan pa e pueblo di Aruba”, Prome Minister a duna di conoce.