Durante su bishita cortico e siman aki na Hulanda pa atende cu varios compromiso di trabou, Prome Minister Evelyn Wever-Croes y Minister Plenipontenciario na Hulanda, señor Ady Thijsen diabierna a atende e reunion di Conseho di Minister di Reino na unda tawata tin riba agenda e cambionan di e Ley di Supervision Financiero di Aruba, LAft. Hulanda na ultimo momento a propone 3 condicion nobo.
E prome condicion: Financieel Beheer; e Minister di Finansa mester duna extra informacion di e maneho financiero;
E di dos condicion: e palabracionnan cu Aruba mester haci cu CAft riba e tema di gastonan di personal prome cu e ley drenta na vigor;
E di tres condicion: tin di haber cu e PPP proyecten.
“E ta un realidad cu e gobierno anterior a mara Aruba cu e debe di PPP proyecten cu financieramente a haci Aruba hopi daño. Pa cua motibo, Gabinete Wever-Croes no ta uza PPP aki mas y a palabra esaki tambe cu Hulanda. Gobierno tin posibilidad pa uza otro proyecto di otro tipo di PPP cu si por ta bon. Minister di Husticia, Rocco Tjon ta purbando tur manera pa yega na un prison nobo cu pa Aruba aworaki ta un necesidad grandi, y pa esaki lo mester uza un tipo di PPP. E minister ta na mesa cu CAft tambe riba e tema aki. Gobierno di Aruba kier duna CAft un rol tambe ora cu un Gobierno kier bay pa un PPP pasobra nos no kier pa tur gobierno den futuro bay uza un PPP manera e gobierno anterior a haci, pasobra nos lo perde tur loke nos a traha duro pa logra”, Prome Minister e enfatisa.
Prome Minister a duna di conoce cu esaki ta e condicionnan cu Gobierno di Aruba y Secretario di Estado Alexandra van Huffelen lo traha riba dje y concretisa den e siguiente dianan pa asina keda cla cu e cambio di e ley di LAft.