Di cuater biahe di estudio di e proyecto ‘Creating 21st Century Teachers’
Oranjestad- Stimula y motiva alumno pa participa y siña na scol no tur ora ta un trabou facil. Afortunadamente, ta existi hopi forma didactico, herment y apps cu por yuda docente den e proceso aki. Pa haya inspiracion, adkiri conocemento y siña habilidad nobo, varios docente di Colegio Arubano a biaha pa Europa durante e aña aki pa forma parti di proyecto di Erasmus+.
E biaha aki, Meneer Figaroa, e juffrouwnan Lopez Henriquez, Maduro, Sanchez, Schnieders y Conrector Wernet a bay Tenerife, Spaña, pa sigui e curso “Innovative Teaching Methods for Teachers, School and Adult Education Staff”.
Durante e curso, nan a descubri metodo y tecnica di dunamento di les nobo cu nan lo por aplica den nan trabou diario. Algun di e topiconan cu a bin padilanti durante e curso ta: Formal, Non-formal & Informal Education, ‘Project/Problem-Based Learning (PBL), Outdoor Education y uzo di ICT den klas. Ademas, nan a cera conoci y intercambia cu otro profesional den enseñansa di otro pais, manera Italia, Alemania, Hungaria, Estonia y Serbia.
Banda di a sigui e curso aki, e docentenan a haya e oportunidad di conoce algun luga emblematico di e isla. Nan a conoce, entre otro, Parke Nacional El Teide, La Orotava y e ciudad moderno Santa Cruz.
Resumiendo, e biahe pa Tenerife tabata uno inolvidabel. E docentenan ta agradecido pa e oportunidad brinda pa por crece tanto profesional como personalmente.
E team di Colegio Arubano ta sigui cu bista riba mas biahe di estudio den futuro y e posibilidadnan cu Erasmus+ ta ofrece pa sigui crece, descubri y inspira.