Tamarijn – Diadomingo merdia algo prome cu 3’or alarma a wordo bati pa un accidente serio ariba e T-Kruising di Tamarijn pa Sero Pita.
E accidente tawata entre un Nissan March y un BMW.
Den e accidente aki multiple persona nan entrenan dos criatura a resulta herida.
Na e sitio nos por a compronde cu e Nissan March lo a bay pa drenta e caminda cu ta bay pa Ayo, unda cu pa un of otro motibo ta hay’e confronta cu un BMW.
E parti dilanti di e March a keda completamente kibra mustrando cu tawata trata di un accidente frontal.
Den e impacto e BMW a bay pega bou di un mata; cu tawata tin algun baranca bou di dje.
Dos unidad di rescate a presenta na e sitio; unda cu bomberonan mester a yuda saca dos adulto for di e vehiculo. Tawata trata di un dama hoben y un cabayero di edad.
Pa locual ta e muchanan nan tawata mustra ok; pero si hopi spanta.
Camindanan cu tawata dirigi unda e accidente a sosode a wordo cera pa trafico, pa laga pasada di tanto ambulance y brandweer yega.
Tres ambulance a presenta y e Rapid Responder, unda cu esnan cu mester a wordo transporta pa Hospitaal a ser hiba.
Takelwagen mester a yega pa hala e autonan for di caminda y tambe saca e BMW for di bou di mata.
Polisnan di trafico a keda pa tuma datonan di e accidente aki.
