ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e dama Douanero H. Fiscal ta acusa H. di a horta un cellular for di un compania. Abogado mr. Rosenstand a cuestiona e investigacion di Polis y esey a causa cu Hues a ordena Fiscal pa haci mas investigacion. E caso a keda pospone pa tempo indifini.
HORTA UN CELLULAR
E acusacion cu Fiscal a presenta den Corte contra H., ta cu den e periodo di 17 Februari 2021 y 17 Maart 2021, el a horta un cellular Samsung for di e cargamento di Lucky Stores. Hues a bisa cu segun e relato di Polis, H. durante di su trabao di “klaar in” cargamento di cellular pa Lucky Stores, a coy un cellular Samsung.
DOUANERO TA NENGA
H. a desmenti categoricamente. El a admiti di a “klaar in” e lote di cellular pero no a coy ningun cellular. Hues a bisa cu segun Lucky Stores, falta un cellular Samsung. Polis a haci investigacion y a resulta cu H. tabatin e cellular aki ta usa dos dia na Juni 2021. For di informacion di Digicel, algun dia e cellular a wordo usa cu e number di Digicel. E chip di Digicel cu e number H. tabata den e cellular. Segun H. e chip di Digicel, el a cumpra via “vraag en aanbond” riba facebook y a bay Digicel pa registra esaki pa asina e us’e ora e viaha pa Curacao caminda su pareha ta keda. El a bisa Hues cu el cumpra e chip na Juli 2023 y un ves so el a usa e chip ey. El a bisa cu e periodo cu Hues ta menciona, e no tabatin e chip. Hues ta mustra cu segun investigacion, for di Juni 2021 e chip ta riba nomber di H.
CARGA DI COMPANIA NO TA CUADRA
Hues a puntra H., con bin el a bay controla e cargamento. H. a splica cu den su computer el a haya e factura di Lucky Stores pa un cargamento di cellular. El a bisa cu hopi biaha tin problema cu lote di cellular pa Lucky Stores. Tabatin 3 caha. A controla tur e cahanan compara cu loke tin para riba e factura. El a controla cu den un caha tin 1 cellular Samsung pero riba e factura ta para cu tin 2. Tabatin cellularnan cu a haya den un caha cu no ta riba e factura. El a haci anotacion di tur esaki y a bay oficina. Den computer el a haci tur e cambionan cu el a constata cu no tabata para riba e factura y Lucky Stores mester a paga extra.
FISCAL
Fiscal a bisa cu Lucky Stores a haci denuncia cu falta 1 cellular Samsung y a duna e number di serie di e cellular. Polis a haci investigacion si e cellular aki a wordo usa na Aruba. A resulta cu e cellular tabata wordo usa cu number di Digicel. E number ta di H. Fiscal a bisa cu e no ta kere cu tabata casualidad. Fiscal ta haya cu H. tabatin e cellular den su poder. E ta haya H. ta culpable di a horta un cellular. Na opinion di Fiscal, esaki ta un caso serio mirando cu H. ta Douane. El a exigi 80 ora di trabao pa comunidad y si no cumpli lo mester bay 40 dia sera. Tambe Fiscal a exigi 1 luna di prison condicional cu 2 aña di prueba.
INVESTIGACION NO TA CORECTO
Mr. Rosenstand a bisa Hues cu el a keda sorprendi cu e investigacion di Polis. E abogado a bisa Hues cu e ta haya cu si realmente Polis a haci un investigacion corecto, H. no mester ta dilanti di Hues.
E abogado a mustra cu segun investigacion di e compania Samsung na Arabia, caminda Lucky Stores a bay busca informacion, for di Februari 2021 e cellular ta activo na Aruba. Segun opinion di mr. Rosenstad, Polis no a haci investigacion riba e informacion aki pa haya sa kende tabatin e cellular aki. El a bisa cu tin camera den Loods y por a mira bon cla cu H. ta inocente. Lamentable ta cu e imagennan a wordo kita. Na November 2021, Polis a bay busca informacion di Setar y Digicel riba e celluar. Despues Digicel a informa cu su chip riba nomber di H. ta den e cellular. Na opinion di mr. Rosenstand, e chip aki tabata wordo usa, promer cu H. a cumpr’e via facebook. Na Juli 2021, H. a registra e chip y a usa esaki na Curacao. E abogado a remarca cu esaki ta un tempo largo despues di entre 3 y 5 Juni 2021 manera Digicel ta bisa.
Mr. Rosenstand a bisa Hues cu e ta haya cu e investigacion ta laga di desea. Na opinion di e abogado, ta incomprendibel cu Polis no a investiga kende tabata usa e cellular na Februari 2021. El a mustra cu Polis no a investiga ki periodo H. a registra e chip na Digicell. E abogado a bisa Hues cu e no ta haya legalmente proba cu H. a horta un cellular y H. mester wordo declara liber.
HUES KIER MAS INVESTIGACION
Fiscal a reacciona cu si Hues ta haya necesario, lo por pospone e caso pa laga Polis haci investigacion pa mustra ki dia e chip a keda registra riba nomber di H. Hues a bisa cu e ta haya cu lo ta bon pa haya sa riba ki dia H. a registra e chip. El a duna Fiscal instruccion pa haci investigacion y ta pospone e caso pa tempo no determina. Esey ta nifica cu despues cu e investigacionnan ta cla, lo bay invita H. un biaha mas pa presenta den Corte pa e ora ey tin mas claridad riba e caso.