ORANJESTAD — Awe Hues di Corte di Husticia a dicta sentencia den e caso sumario cu Aruba Post N.V. (Post) a cuminsa contra SEPPA. Hues a para temporal e CAO.
Ta asina cu tin un CAO firma entre Post y SEPPA pa e periodo di 2010 pa 2013. No a sera CAO nobo. Den articulo 25 ta para cu cada aña na Januari e trahadornan ta haya un aumento di 105 florin riba nan salario.
POST A STOP DI PAGA
Na Augustus 2013, Post a stop di paga. Post bisa SEPPA cu e no por paga mas debi na situacion financiero hopi malo.
CASO CONTRA POST
10 empleado di Post representa pa SEPPA a cuminsa un caso profunda y dia 4 Juli 2023 Hues a ordena Post pa sigui paga e aumento di salario, te ora entre Post y SEPPA tin un CAO nobo.
POST BANCAROTA
Post, representa pa mr. D.Kock a cuminsa un caso sumario contra SEPPA. Den e caso mr. Kock a pidi Hues pa para e CAO desde 1 Januari 2022 pendiente di decision di apelacion di Post contra e sentencia di 4 Juli 2023. Mr. Kock a mustra Hues relato financiero di Post di 2013 cu ta mustra cu pa añas Post ta bancarota y ta Gobierno ta pagando e aumento di salario di e empleado.
HUES A PARA E CAO
Awe mainta Hues a dicta sentencia caminda el a bisa cu e ta para e CAO entrante 1 Januari 2022 pa cu e pagamento di aumento di salario. Esaki bao di e condicion cu promer di 31 December 2023, Post mester tin un sentencia di e caso cu e la apela.