Siman pasa oficialmente a firma un acuerdo entre Horacio Oduber Hospital (HOH) y Wilhelmina Kinderziekenhuis (WKZ) cu e meta primordial pa intercambia conocemento y experiencia riba tereno di cuido di mucha sin importa enfermedad of condicion medico. E desaroyo valioso aki a sali for di ya caba otro cooperacion anterior riba otro tereno y awo nos por ta orguyoso como isla cu pa nos muchanan tambe tin un cooperacion cu Hulanda pa hunto sigui eleva calidad di cuido.
E acuerdo ta un realidad
Tabatin presente na e firmamento di e acuerdo aki un delegacion di WKZ Hulanda y HOH Aruba. “Un bunita ehempel di cooperacion sin frontera riba tereno di cuido y experticio,” asina infecciologo di mucha Louis Bont, professor ‘Luchtweginfecties op de kinderleeftijd’ na UMC Utrecht a menciona cu un sonrisa. Pues awo pa un duracion di tres aña un pediatra di WKZ Hulanda lo bin HOH Aruba y brinda cuido, intercambia experticio y conocemento y mas y tambe pediatranan di HOH y tambe miembronan di Hunta di Directiva lo bay Utrecht Hulanda cu e mesun meta.
Jacco Vroegop, Presidente di Hunta di Directiva di HOH: “Mi ta sumamente orguyoso cu a logra formalisa e cooperacion aki entre e grupo di pediatranan di WKZ Hulanda y di HOH Aruba. Esaki ta brinda apoyo enormemente den loke ta nos esfuerso pa logra yega na cuido di mucha amplio y di calidad na Aruba, y tambe pa un futuro unda nos muchanan ta saludabel y contento den nos Hospitalnan.”
Cooperacion riba tereno di pediatria
WKZ Hulanda t’ey pa tur mucha, pues no solamente muchanan cu ta admiti na WKZ Utrecht. Ya conhuntamente nos tin un cooperacion riba tereno di neurocirugia, y awo pa loke ta tereno di pediatria esaki ta uno nobo. Mescos cu neurocirugia ta rekeri delicadesa preciso, asina tambe e cooperacion entre pediatranan ta rekeri un coordinacion estrecho y alabes comparticion di conocemento. Di e forma aki Aruba ta forma parti di e region di cuido di UMC Utrecht.
Eric Arends, vakgroepvoorzitter di pediatria na Aruba a menciona: “Cu hopi entusiasmo nos ta mira den futuro pa un cooperacion mutuo constructivo cu e solo meta pa eleva calidad di cuido di mucha na Aruba. Pues un tremendo paso pa nos tur!”
Pa tur dos hospital e cooperacion aki ta un ‘win-win’. E Hospital di Aruba ta interesa den e aporte riba tereno academico pa asina logra optimalisa y eleva calidad y alabes ta reforsa e capacidad di e team. Ademas Aruba ta forma parti di Reino Hulandes. HOH tin e necesidad grandemente pa ‘waarnemers’ riba tereno di pediatria di forma structural, ta desea di por manda pashent pa WKZ y mehora calidad di cuido door di intercambio di personal. Pa WKZ esaki ta un oportunidad strategico y alabes pe pediatranan cu ta biaha un bunita chens pa haya (extra) experiencia y trece esaki bek pa WKZ. Pabien Hospital, pabien muchanan y pabien Aruba!
