Dialuna anochi, durante e conferencia di prensa extraordinario di Gobierno di Aruba, Gobierno a comparti e bon noticia cu pa prome biaha den historia di pais Aruba, gobierno ta entrega un presupuesto supletorio pa 2023, cu entrada adicional di 25 miyon florin. Debi na e maneho responsabel y estricto di Gabinete Wever-Croes, esaki tawata ta un aña remarcabel cu a conduci na extra entrada, extra fondo pa inverti den extra proyectonan e aña aki ainda.
Na e ocasion, tur Minsiter di Gabinete Wever-Croes tawata presente y cada un a haya e oportunidad pa splica con nan lo aloca e fondo extra den nan ministerio. Prome Minister Evelyn Wever-Croes a elabora tambe riba e nota di cambio aki (najaarsnota) y e cambionan pa su ministerio.
Ombudsman
E proceso pa busca un ombudsman, Defensor di pueblo, ta andando y ta bou di encargo di un comision totalmente independiente. E ronda di solicitud a cera caba. Ministerio di Asuntonan General ta cubri gastonan relaciona cu Ombudsman te ora cu e oficina di Ombudsman ta completamente riba su mes.
Landspakket
Tin diferente tarea di reforma cu ta tumando luga den cuadro di Landspakket. Departamentonan di tur ministerionan hunto ta trahando riba 84 proyecto cada kwartal cu ta wordo coordina pa Ministerio di Asuntonan General.
Inversionnan
Cu e 25.1 miyon adicional di Presupuesto Supletorio 2023, Ministerio di Asuntonan General tambe lo logra realisa algun proyecto.
• Reemplaso di computer na Departamento di Recurso Humano cu lo yuda pa e funcionamento mas agil di e departamento.
• Parlamento. E parti patras di e edificio di Parlamento lo wordo remodela completamente. Ta trata aki di oficinanan di Parlamento. Asina tambe Gobierno ta fortifica mas aun nos democracia di nos pais permitiendo tambe pa Parlamento traha den un edificio mas adecua.
• Wilhelmina Brug cu actualmente ta den hopi mal estado, lo wordo drecha y remodela.
• Juliana Brug cu tambe ta den estado precario, lo wordo drecha y remodela.
• Kadaster y DTI tambe lo haya atencion debido.
• Lo asfalta camindanan cu tin mas prioridad y ta den mas mal estado, cu ta wordo frecuenta pa mas tanto hende y cu, segun e criterianan, ta den estado di peliger.
Prome Minister a expresa di ta sumamente orguyoso, no solamente di coleganan minister, sino especialmente tambe di nos profesionalnan. “Mi ta kere den Aruba, mi ta kere den nos hendenan. Y nos profesionalnan a demostra cu e maneho cu nos ta hibando riba nan conseho, ta e maneho indica pa nos hiba nos pais padilanti. Ainda nos no ta unda cu nos mester ta, ainda nos tin trabounan pa haci. Pero nos lo logra.
E indicadornan macro economico di nos pais ta mustrando positivo. Awo loke cu nos kier ta pa tur e progreso y bienestar cu nos ta mira riba papel, traduci su mes den progreso y bienestar den cada hogar, pa cada ciudadano di nos pais berdaderamente sinti cu nos pais ta bay bon danki na esfuerso, sodo y labor di cada ciudadano. Pa cada un sinti esaki den nan hogar hunto cu nan famia.
Gobierno ta preocupa cu costo di biba, cu desaroyonan mundial cu tin impacto riba nos. Positivo ta cu inflacion ta bahando y cu inflacion na Aruba ta mas abou cu e ta mundialmente. Gobierno ta percura pa e poder di compra di cada famia por fortifica su mes. Den bida nos ta encontra retonan y situacionnan dificil y hasta negativo. Den momentonan asina, den union y positivismo, nos mester concentra riba cosnan positivo. Asina nos por mira oportunidad y solucion hasta pa e retonan di mas grandi. E amor cu cada un di nos tin pa nos pais, ta duna nos forsa pa nos continua”, Prome Minister a enfatisa.
