Dia 19 di october a tuma luga entregamento di premio di e Concurso di Pintamento cu topico Cacho den Cura na Bestuurkantoor.
ORANJESTAD: Dia 19 di october 2023, nos a ricibi e ganadonan di e Concurso di Pintamento 2023 titula Cacho den Cura na Bestuurkantoor. Minister President Evelyn Wever-Croes hunto cu Minister di Enseñansa y Deporte Endy Croes, Minister di Finansas y Cultura Xiomara Maduro, hefe di Cuerpo Policial Sr. Ramon Arnhem y demas invitadonan tabata presente den e ocasion aki. Durante e atardi ameno aki, a entrega e 30 ganadonan un ceritificado y obsekio. Sra. Irene Croes, a indica cu desde aña 2019 cu a bin ta haciendo e concurso aki a haya rond di 400 pintura y aña aki e cantidad a aumenta drasticamente cu un total di 1222 pintura di cacho di scol basico solamente. Na aña 2019, Minister President Evelyn Wever-Croes a bin cu a iniciativa aki pa atende e problematica di cacho riba caya. E aña aki Minister di Enseñansa Endy Croes y Minister di Husticia Rocco Tjon ta carga e proyecto aki. Minister President a indica cu e concurso ta basa riba e ley di cacho. “Cacho mester ta den cura y no riba caya. Un ley cu ta preveni pa cacho bira molester pa nos comunidad, pero tambe cu ta obliga e persona cu tin un cacho na e cuido minimo cu e responsabilidad aki ta trece cu ne”, Minister President Evelyn Wever-Croes a expresa. Minister Endy Croes ta trahando duro pa e proyecto aki drenta curiculo di scol, unda cu e alumnonan por siña di derecho y debernan cu tin pa cacho y Minister Rocco Tjon ta percura pa Cuerpo Policial keda controla cu e comunidad ta cumpliendo cu e ley di cacho debidamente. Na aña 2019, veterinario Sra. Irene Croes a cuminsa traha riba e Plan Nacional y entrega esaki na Vice Presidente Ursell Arends na aña 2021 y desde e tempo aki Minister Ursell Arends ta trahando riba e Plan Nacional pa atende cu problematica di cacho riba caya. Finalmente, Minister di Enseñansa Endy Croes ta felicita tur e ganadonan pa nan bunita trabou y ta gradici tur mayor, maestro, scol cu a contribui y motiva e alumnonan pa participa den e concurso aki. Alabes, e mandatario di Enseñansa ta gradici tur stakeholder y e team cu a organisa e evento aki pa di cinco (5) aña consecutivo cu e meta di educa e comunidad di nos ley di cacho y conscientisa henter e Pueblo di Aruba con pa cuida nos cachonan debidamente.
