ORANJESTAD – Awe for di mainta te den oranan di merdia, a trata e caso penal cu Ministerio Publico a cuminsa contra 7 sospechoso di posecion, transporta y bendemento di droga. Un di e sospechosonan ta den libertad.
ARUBA NATIVE por a compronde cu den un accion relampago di e agentenan di narcotica riba 21 Maart 2023, a confisca mas cu 41 kilo di cocaina y 7 persona a keda deteni como sospechoso di posecion, bende marihuana.
ACUSACION
E sospechosonan ta e dama Venezolano biba na Aruba S.C.(25), e homber Venezolano biba na Aruba A.M.R.(33), e dama M.P.((61), e ruman homber R.P.(63), un familiar homber E.P.(34), e homber Venezolano biba na Aruba J.R. (30) biba na Aruba y e homber A.G. (33).
Fiscal a bisa S.C. y A.M.R. a transporta y tabatin un cantidad di marihuana dia 21 Maart 2023. E dama M.P., R.P. y E.P. ta wordo acusa cu entre 21 Maart 2018 y 21 Maart 2023 a transporta, posecion y, bende di marihuana y cocaina. E homber A.G., ta wordo acusa di posecion di cocaina riba 21 Maart 2023.
Riba preguntanan di Hues, A.G. a admiti. E dama M.P. a bisa cu e tabatin marihuana y no cocaina. El a nenga total di a bende droga. E homber R.P. a bisa cu e tabatin 2 liber (1 kilo) di marihuana pero no a bende. El a bisa cu e droga tabata pa su mesun uso. E.P. a admiti di tabatin droga 75 gram cocaina y 88 gram di marihuana. El a bisa cu ta pa su mesun uso. S.C. a bisa cu e tabatin marihuana den su posecion y a bende riba 21 Maart 2023, 2 liber. Segun e dama S.C. e lote di marihuana a yega serca nan dia 20 Maart 2023. E homber J.R. a bisa cu dia 21 Maart 2023 el a bay hiba droga pa S.C.
INVESTIGACION RIBA DROGA
Hues a mustra cu segun e relato di Polis, Polis a haya informacion cu un Venezolano Moreno lo tin un lote di droga scondi den un apartamento. Fiscal a duna orden pa e team special di droga bay observa. Polis mira S.C. y A.M.R. riba 21 Maart. 2023. Nan a mira movecionnan sospechoso, caminda S.C., A.M.R. y J.R. a bay na un cas na Tanki Leendert cu ta conoci pa bende droga. Despues nan a bay na Monserat caminda un homber a baha cu un tas. E agentenan di narcotica tabata sospecha cu nan lo ta bendiendo droga.
DROGA DEN AUTO
Na dado momento e patruya a para e auto y a haya un paki di marihuana cu ta pisa 518 gram. A detene S.C. y A.M.R. A confisca 3 cellular. A.M.R. a kibra un cellular ora el a wordo deteni. For di e otro 2 cellular a haya informacion importante tocante droga. A resulta cu e tal Moreno ta A.M.R.
DROGA DEN APARTAMENTO
Polis a bay investiga na un apartamento na Sabana Liber, unda S.C. y A.M.R. ta keda. A haya diferente paki di marihuana, buki cu informacion tocante droga. En total, 80 paki di marihuana a keda confisca. E 80 pakinan a pisa mas cu 41 kilo di marihuana. Tambe a confisca 3304,85 florin Doño di e compleho di apartamento a bisa cu el a huur e apartamento cu S.C. y despues cu A.M.R. a bin keda eynan, ta haya hopi holor di marihuana.
DROGA DEN CAS
E agentenan a bay haci investigacion na e cas na Tanki Leendert unda S.C. y A.M.R. a bay entrega un paki y …BINGO. Den diferente camber den e cas a haya marihuana, cocaina, cosnan pa prepara droga pa bende y tambe placa. Den e camber mey mey, a haya un tas cu marihuana y cocaina cu ta di E.P. Den tas tabatin 88 gram di marihuana y 76,9 gram di cocaina. Den e mesun camber den un lessenaar a haya 40,9 gram di cocaina. Segun E.P. e cocaina den e lessenaar ta di dje. Den comedor a haya un tubo di M&M cu sakitonan di cocaina cu a pisa 3,7 gram. Segun R.P. eseynan ta pa su mesun uso, ora e sali. Tambe a haya un tas di bril cu sakitonan cu marihuana cu a pisa 24,6 gram. E dama M.P. a bisa cu esey ta di dje pa e traha na thee. Den camber di M.P. a haya masha hopi marihuana parti den diferente contenedor. En total esaki a pisa 1647 gram. Tambe a haya 2 piedra di cocaina cu a pisa 1.3 gram. Segun M.P. esey ta e marihuana cu A.M.R. a hiba mainta pa su ruman homber R.P. Segun M.P. el a aparta e droga pa traha remedi di nan.
DROGA DEN APARTAMENTO
E agentenan a sigui bay na e apartamento na Monserat caminda A.G. ta keda. Eynan a haya 75,9 gram di cocaina.
A basa declaracion di S.C. y A.M.R., e agentenan a bay detene J.R. El a wordo haya cu 1820 dollar. Na su cas a haya algo di marihuana.
Hues a bisa cu tin diferente testigo cu a declara cu na e cas na Tanki Leendert ta bende marihuana y cocaina. Testigonan a bisa cu E.P. ta conoci pa bende droga eynan. E ruman di M.P. y R.P. a bisa cu su rumannan ta bende droga pa 5 aña caba na e cas. Pesey e no ta papia cu nan.
IMPORTA LOTE DI MARIHUANA
For di e interogacionnan haci di e agentenan di droga, por a constata cu e dama S.C. a coopera cu e investigacion. El a bisa cu e intension tabata pa bende tur e 80 pakinan. E lo haya 1000 florin di ganashi riba cada paki. El a bisa cu entre e y A.M.R. a paga 12 mil dollar pa e pakinan. E placa a duna un persona cu a hiba Colombia. Dia 20 Maart 2023, A.M.R. a bay busca e pakinan. A pone esakinan den un cashi di paña den e apartamento.
J.R. a declara na e agentenan cu el a tuma contacto cu e dama S.C. kende a busk’e pa entrega droga na cas di R.P. na Tanki Leendert cu ta conoci pa bende droga. J.R. a ofrece R.P. marihuana y a haya 1800 florin for di R.P. E dama S.C. a bay busca un otro liber y R.P. a paga otro 1800 florin. El a bisa cu tur hende sa cu e dama S.C. ta bende droga y ta busca hende pa bende p’e. El a bisa cu un biaha so el a bende pa e dama S.C. A confronta J.R. cu declaracion di A.M.R., kende ta bisa cu e pakinan di droga ta di J.R. El a nenga retundamente. El a bisa cu nunca el a bay na e apartamento y no sa nada di e droga. El a nenga cu su nomber ta El Gocho.
FISCAL
Fiscal a bisa cu Aruba ta wordo usa como trampolin pa traficantenan di droga. Droga ta un problema grandi na Aruba. Pa A.G. cu a wordo laga liber, el a exigi 80 ora di trabao of 40 dia sera. Tambe Fiscal a exigi 170 dia di prison di cual 150 dia ta condicional cu 3 aña di prueba.
Pa e dama M.P. su ruman homber R.P. y e familiar E.P., Fiscal ta haya cu nan mester di guia. El a exigi pa M.P., 18 luna di prison di cual 10 luna ta condicional cu 3 aña di prueba y bou guia Reclasering. Pa R.P. y E.P., Fiscal a exigi 24 luna dia di prison di cual 12 luna ta condicional cu 3 aña di prueba y bou guia di Reclasering. Fiscal a hala nan atencion cu Polis tin nan na bista pa bendemento di droga.
Pa e Venezolano J.R., Fiscal a exigi 18 luna di prison di cual 6 luna ta condicional cu 3 aña di prueba. Pa e dama Venezolano S.C., Fiscal a exigi 30 luna di prison di cual 6 luna ta condicional cu 3 aña di prueba. Pa A.M.R. Fiscal a exigi 3 aña di prison. Hues a bisa cu e ta bay studia e caso y despues di algun siman lo tin sentencia.