Crisis Management Office (CMO) lo ofrece un nivel mas halto di siguridad publico pa henter comunidad
ORANJESTAD – Diaranson merdia, Prome Minister Evelyn Wever-Croes a asisti na e lansamento di e website, logo y nomber nobo di e oficina cu tabata Bureau Rampenbestrijding Aruba (BRA). E oficina nobo lo yama Crisis Management Office (CMO), y a wordo lansa cu e meta pa ilustra e siguiente pasonan pa loke ta preparacion pa cualkier calamidad. Prome Minister a indica cu BRA conhuntamente cu crisisteam semper tabata bon prepara pa cualkier desaster, pero awor a tuma e paso pa cuminsa prepara pa riesgo, mirando cu unabes bo ta prepara pa riesgo, bo ta prepara caba pa cualkier desaster.
Prome Minister a splica, cu e ta un hecho cu despues di cualkier calamidad, e recuperacion ta mas lihe si bo ta bon prepara. Esaki ta conta tambe pa cada persona den nan hogar, y awor cu e hermentnan cu CMO tin, comunidad di Aruba lo ta miho prepara.
E webiste nobo di CMO, lo brinda como fuente di informacion pa comunidad, na unda tur hende por subi y wak e tempo, of si tin cualkier riesgo di calamidad, kico ta e pasonan cu lo bay tuma, kico ta e structura, y e decisionnan cu ta wordo tuma. Cu esaki mi ta sigur cu nos ta yega na un nivel mas halto di siguridad publico pa henter comunidad.
“Mi ta felicita señor Rino Hermans, y henter e ekipo di CMO, tur miembro di crisisteam, di beleidsteam, di operationeelteam, y tur klusters, cu semper a duna nan cooperacion pa Aruba ta bon prepara. Danki na cada un di boso cu semper a traha incansabelmente pa mantene e comunidad di Aruba sigur”, Prome Minister a expresa.