ORANJESTAD: Diasabra atardi, tabata prome biaha despues di shete (7) aña cu seleccion di Aruba a hunga un wega oficial na cas. Pueblo di Aruba a baha masalmente pa presencia e wega clasificatorio di CONCACAF Nations League unda cu nos Seleccion Masculino a enfrenta US Virgin Islands. Manera ta conoci, Compleho Deportivo Guillermo Prospero Trinidad ta den pleno renobacion y no ta cla ainda, pero FIFA a aproba e yerbe artificial y a haci algun excepcion pa e weganan clasificatorio di CONCACAF Nations League por a tuma luga na stadion Dakota. Minister Endy Croes a indica cu na luna di mei a haci e palabracion cu si cumpli y logra renoba e turf y si e turf ta aproba pa FIFA, FIFA lo duna un excepcion pa hunga e wega cas. Tur stakeholder a traha duro pa cumpli cu e lista di excepcion y pa tin tur cos na ordo pa asina nos seleccion por a hunga na cas. Desde diaranson, tin un representante di CONCACAF na Aruba cu a controla e trabou. Minister Endy Croes a enfatisa cu hunto den ekipo a logra pa Aruba hunga na cas. Sigur un bunita wega unda cu nos Seleccion Masculino a gana US Virgen Islands cu e score di 3-1, golnan anota pa Rovien Ostiana, Diederick Luydens y Mishawn Molina. Quin Farrel a anota e unico gol pa US Virgin Islands. Pa conclui, Minister Endy Croes ta gradici Gabinete Wever – Croes II y Lotto pa Deporte pa pone e fondonan disponibel pa renobacion di e stadion. Tambe, mandatario di Deporte a subraya cu e ta contento di e colaboracion cu CONCACAF, FIFA, AVB y alabes minister Endy Croes ta felicita Seleccion di Aruba cu e gran victoria aki. Palabranan di pabien na entrenado Sr. Marvic Bermudez y su staf y ta gradici Pueblo di Aruba cu a sa di sostene nos Seleccion Masculino. Pabien Aruba! Cu disciplina, deseo, dedicacion y determinacion a logra.
