Diamars 17 di October 2023 Partido AVP lo sigui brinda asistencia pa cu yenamento di formulario di Impuesto na e comunidad di San Nicolas na YMCA. For di 7’or te 9’or di anochi e team di voluntario di Partido lo ta presente na YMCA SAN NICOLAAS pa asisiti e comunidad di San Nicolas cu yenamento di e formulario di impuesto 2022(Inkomestenbelasting).
Lider di Partido mr. Mike Eman lo ta presente tambe pa atende e comunidad cu otro temanan cu por tin tambe y pa scucha Pueblo di San Nicolas na YMCA hunto cu coleganan y voluntarionan Rene Herde, Mike de Meza, Mervin Wyatt Ras, Monica Oplaat, Dennerich Kelly, Wendrick Cicilia y Frits de Palm.
Desde e luna di September Partido AVP a inicia cu anochinan di asistencia pa cu yenamento di e formulario di Impuesto na Cas di Partido Playa. For di tur skina di Aruba ciudadanonan a asisti na Cas di Partido pa asina ricibi ayudo cu nan formulario di e equipo di expertonan voluntario. Centenares di ciudadano a bini Cas di Partido playa pa ricibi asistencia e ultimo simannan tras di lomba y centenares di formulario di impuesto a wordo yena. Partido AVP ta contento cu e reaccion di nos comunidad y ta intenta pa mehora e servicio cada aña pa asina por sigui asisti nos ciudadanonan.
Diamars awor, 17 di October Partido AVP lo sigui brinda asistencia pa cu yenamento di formulario di Impuesto na YMCA San Nicolas.
E documentonan necesario cu lo mester trece ta resumen di entradanan pa aña 2022 (Loonopgaaf), Carta nan di interes di hypotheek (APFA, FCCA OF BANCO), carta di interes di prestamo personal (BANCO, ISLAND FINANCE OF TOTAAL FINANCE), recibo of comprobante di gastonan extaoridanrio y adicional (CUIDO MEDICO, ESTUDIO y GASTONAN IRREGULAR) effectua den e aña 2022.