ORANJESTAD:
Diasabra pa 3’or di atardi, cu hopi orguyo nos por a mira e selecion nacional di Aruba subi veld di Compleho Deportivo Guillermo Prospero Trinidad pa asina hunga contra e selecion nacional di U.S. Virgin Island, den e CONCACAF Nations League.
E wega aki a tuma luga despues di 7 aña cu e veld nan tabata den un mal estado y no tabata wordo permiti pa hunga weganan internacional na Aruba.
Na 2016 maske cu e veld ya caba tabata den un malestado a permiti e selecion di Aruba hunga toch un ultimo wega internacional. For di 2005 no tabata haci suficiente mantencion cu e veld y desde 2010 nan no tabata wordo ni manteni mas.
Poco poco cu cambionan den directivanan di Lotto y FFD, Minister di Deporte Endy Croes, por a cuminsa conta cu nan cooperacion y asina porfin gobierno por a aproba financiamento di e renobacion di nos stadion nacional, cu ta e Compleho Deportivo Guillermo Prospero Trinidad. E renobacion no ta completamente cla ainda, pero e partinan mas necesario pa nos selecion por a hunga na cas ta cla y awo ta sigui pa termina e renobacion di nos Stadion Nacional.
E mundo di futbol na Aruba sigur ta hopi contento cu porfin despues di 7 aña selecion nacional di Aruba por hunga weganan internacional na cas mes.
E wega di diasabra a wordo domina pa Aruba for di comienso y Aruba tabata tin posession di e bala por bisa pa dos tercer parti di wega. Un victoria hopi bon mereci pa nos selecion nacional. Alabes cu e resultado aki Aruba ta keda na prome lugar den su grupo,
Aruba ta gana cu score di 3 – 1
Goalnan di Aruba a wordo anota pa
Rovien Ostiana 51 minuut
Diederick Luydens 61 minuut
Mishawn Molina 86 minuut
E goal di Us Virgin Islands a wordo anota pa
Quinn Farrel 63 Minuut.
Tur cos ta mustra cu selecion di Aruba, lo promove pa Liga B den e siguiente edicion di Concacaf Nations League.
Otro luna selecion nacional di Aruba lo tin un otro compromiso pa hunga na cas y e biaha aki contra Cayman Islands.
E wega di diasabra atardi a conta cu un bon presencia di publico, un total di 1200 persona presente.
Dia 30 di oktober lo ta bay tin un otro wega den Compleho Deportivo Guillermo Prospero Trinidad, e biaha aki nos selecion nacional di damas lo hunga contra e selecion di damas di Boneiro.
