ORANJESTAD – Na final di conferencia di prensa di Gobierno di Aruba, Prome Minister Evelyn Wever-Croes a duna un declaracion di ciere, na unda el a expresa e importancia di ta un pueblo uni, enfatisando cu den bida, no ta tur ora bo ta haya loke bo kier, pero esaki no ta motibo pa give up.
Prome Minister a expresa cu Gobierno di Aruba por ta decepciona di e forma con e negosacionnan a bay, pasobra como pais den Reino, Aruba lo a spera un trato diferente, pero cu apesar di e trato ricibi, pais Aruba no lo kibra.
“Nos comunidad ta consisti di hendenan fuerte, resiliente y uni, cu ta e arma pa yuda e pais sigui bay dilanti. Awe mi ta para aki hunto cu mi colega Minister di partido Raiz, Ursell Arends, pa ilustra e union.
Aruba a enfrenta tanto reto den su historia cortico, pero a sa di enfrenta nan y surpasa nan danki na e union cu semper a reina den comunidad, y e amor cu cada ciudadano tin pa e pida baranca aki. Ban laga e union y amor cu cada un di nos tin pa pais Aruba, determina nos pasonan padilanti. Esaki sigur tabata un experiencia mas, y awor cu mas forsa, nos lo sigui padilanti, cu positivismo, cu fe y perseverancia, y nos sa cu nos lo logra”, Prome Minister a expresa